મતદાન જાગૃતિ ની કામગીરીમાં આરોગ્ય વિભાગના કર્મચારીઓ પણ જોતરાયા…

આરોગ્ય કર્મચારીઓએ લોકોના ઘરે ઘરે જઈને મતદાન અંગે જાગૃતિ ફેલાવી..

પાટણ તા. ૨૦
પાટણ જિલ્લામાં લોક સભા સામાન્ય ચૂંટણી-2024માં ત્રીજા તબક્કા માં આગામી તા.07 મેના રોજ મતદાન થવાનું છે. ત્યારે પાટણ જિલ્લામાં વધુ મા વધુ મતદાન થાય તે માટે તંત્ર પ્રયત્નશીલ બની મતદાન જાગૃતિ ની કામગીરી કરી રહ્યું છે ત્યારે મતદાન જાગૃતિ ના આ કાર્યક્રમમાં પાટણ જિલ્લા વહીવટીતંત્રની સાથે સાથે આરોગ્યતંત્ર પણ જોતરાયુ છે. પાટણ જિલ્લા આરોગ્યતંત્રના કર્મચારીઓ લોકોના ઘરે ઘરે જઈને લોકોને મતદાન કરવા માટે પ્રેરિત કરી રહ્યા છે. જિલ્લામાં મતદાન જાગૃતિ ના આ કાર્યક્રમોમાં આશા વર્કર, આશા ફેસીલેટેટર, આરોગ્ય કર્મચારીઓ સામેલ થઈ રહ્યા છે. સ્વીપ પ્રવુતિ અંતર્ગત આયોજિત થતા કાર્યક્રમો હેઠળ જિલ્લાના આરોગ્ય વિભાગ દ્રારા ડોર ટુ ડોર પ્રચાર –પ્રસાર કરવામાં આવી રહ્યો છે.

પાટણ જિલ્લાના તમામ તાલુકામાં દરેક ગામના આશા, આશા ફેસીલેટેટર, તેમજ આરોગ્ય સ્ટાફ દ્વારા મતદાતાઓને ઘરે જઈને મતદાન અંગે સમજ આપવામાં આવી હતી. કાર્યક્રમોમાં મતદાન જાગૃતિના સુત્રોચાર, સેલ્ફીઓ, બેનરો, પોસ્ટર, દવાની સ્ટ્રીપો પર સ્ટીકર લગાવીને પ્રચાર-પ્રસાર, રેલીઓ, મીટીંગો, શપથ ગ્રહણ, રંગોળી અને સંકલ્પ જેવી વિવિધ પ્રવૃતિઓ કરવામાં આવી હતી. તેમજ ગામના મત દાતા ઓ ને તા.07 મેના રોજ મતદાન કરવા અંગે શપથ ગ્રહણ કરાવવામાં આવ્યા હતા.

TIP નોડલ ઓફિસર વ જિલ્લા વિકાસ અધિકારીના અધ્યક્ષ સ્થાને આયોજીત મિટીંગમાં નક્કી થયા મુજબ આગામી સમયમાં તા. 28.04.2024, તા.30.04.2024, અને તા. 01.05.2024 ના રોજ મતદાન જાગૃતિ માટે જિલ્લાના અન્ય વિભાગો સાથે સંકલનમાં રહી આરોગ્ય વિભાગ દ્વારા વિવિધ કાર્યક્રમો, પ્રવૃતિઓનું આયોજન કરવામાં આવ્યું હોવાનું જાણવા મળ્યું છે.

અહેવાલ યશપાલ શ્યામી