પાટણના સાગોડીયા ગામેશ્રી નકળંગજી ભગવાનના જન્મ શતાબ્દી મહોત્સવસાથે ભંડારાનો કાર્યક્રમ ભક્તિમય માહોલમાં ઉજવાયો…

ગુજરાત ના જાણીતા લોક કલાકારો સાથે ખજુર ભાઈ એ પણ ઉપસ્થિત રહી પ્રસંગને યાદગાર બનાવ્યો..

પાટણ તા. ૨૦
પાટણ સમીપ આવેલા સાગોડિયા ગામે શ્રી ભાટિયા જ્ઞાતિ સમાજ પાટણના ઈષ્ટદેવ શ્રી નકળંગજી ભગવાનનો જન્મ શતાબ્દી મહોત્સવ કાર્યક્રમ ભકિત સભર માહોલમા ગુજરાત ના ખ્યાતનામ કલાકારો સહિત ખજુર ભાઈ ની ખાસ ઉપસ્થિત મા કારતક વદ બીજ ના પવિત્ર દિવસે ઉજવવામાં આવ્યો હતો. સાથે સાથે શ્રી ભાટિયા જ્ઞાતિ સમાનો દિપાવલી સ્નેહ મિલન પણ યોજાયો હતો.

આ પવિત્ર પ્રસંગે શ્રી નકળંગજી ભગવાનનો ભંડારા (સમૂહ ભોજન પ્રસાદ)નો કાર્યક્રમ પણ શ્રી મહામંડલેશ્વર દ્વારા કરાયો હતો જે ભંડારામાં ૪૦૦ કરતાં વધુ સાધુ સંતોએ ઉપસ્થિત રહી પાટણ ભાટીયા સમાજને રૂડા આશીર્વાદ પાઠવ્યા હતાં. કાર્યક્રમમાં શ્રી ભાટિયા જ્ઞાતિ સમાજના જ્ઞાતિ જનો અને સાગોડિયા ગામના ગ્રામજનોએ સાથે મળીને શ્રી નકળંગજી ભગવાન, શ્રી રામાપીર દાદાની આરતી કરી સૌએ સમૂહ ભોજન પ્રસાદ ગ્રહણ કર્યો હતો.

આ પ્રસંગે દૂર દૂરથી પધારેલા સાધુ સંતોનું સમાજ દ્વારા ઢોલ નગારા અને પુષ્પવર્ષા સાથે સ્વાગત સન્માન કરવા માં આવ્યું હતું. ઉપસ્થિત તમામ સાધુ સંતોએ શ્રી નકળંગજી ભગવાનની પૂજા અને મહાઆરતી કરી ભંડારામાં સૌ સાધુ સંતો એક પંગતમાં પ્રસાદ ગ્રહણ કર્યો હતો. દરેક સંતોને કેસરી ખેસ અને શાલ ઓઢાડી ભેટ પૂજા અપૅણ કરવામાં આવી હતી.

શ્રી ભાટિયા જ્ઞાતિ સમાજના જ્ઞાતિજનો અને સાગોડિયા, પાલડી અને અજીમણા ગામના સૌ ગ્રામજનો એ રાત્રે ઉત્તર ગુજરાતના પ્રસિદ્ધ કાલાકાર કીર્તિદાન ગઢવી, ગીતાબેન રબારી અને ખજૂરભાઈ (નીતિન ભાઈ) જાની ના લોક ગીતોની રમઝટ માણી હતી. કલાકારો એ પણ ઉપસ્થિત સૌને દેશી ગીતો દ્વારા મંત્રમુગ્ધ કરી દીધા હતા.

આ કાર્યક્રમનું સમગ્ર આયોજન શ્રી નકળંગ હિંદુ મંદિર ટ્રસ્ટના કમિટી મેમ્બર્સના સદસ્ય સાગર ભાઈ ભાટિયા દ્વારા સફળતા પૂર્વક કરવામાં આવ્યું હતું. કાર્યક્રમની વ્યવસ્થાઓ કરવામાં શ્રી નકળંગજી હિંદુ મંદિર ટ્રસ્ટના ટ્રસ્ટીઓ,ભાટિયા જ્ઞાતિના ટ્રસ્ટીઓ, જ્ઞાતિજનો તથા સાગોડિયા ગામના ગ્રામજનોએ જહેમત ઉઠાવી  હતી.

અહેવાલ યશપાલ સ્વામી