ગૌરી વ્રત નિમિત્તે પાટણ શહેરની ત્રણ સરકારી સ્કૂલોના વિદ્યાર્થીઓએ ધી ખેતીવાડી ઉત્પન્ન બજાર સમિતિની મુલાકાત લીધી.

બાળકોને એપીએમસીની કાર્યપદ્ધતિ ની જાણકારી આપી જુમાન્જી ફિલ્મ બતાવી ફરાળી ફૂડ પેકેટનું વિતરણ કરાયું…

પાટણ તા. ૧૯
પાટણ શહેરની જીલ્લા શિક્ષણ સમિતિ પાટણ સંચાલિત ગાંધી સુંદરલાલ પ્રાથમિક કન્યા શાળા તેમજ તારાબેન મહેતા અનુપમ પ્રાથમિક કન્યા શાળા અને બગવાડા પ્રાથમિક શાળાની આશરે ૪૫૦ થી વધુ વિધાર્થી અને વિધાર્થીનીઓએ શિક્ષણ ની સાથે સાથે બાહ્ય જ્ઞાન પ્રાપ્ત થાય તેવા શુભ ઉદ્દેશથી અને ગૌરીવ્રત ના પાવન પર્વ નિમિત્તે પાટણ એપીએમસીના ચેરમેન સ્નેહલભાઈ પટેલ અને સમિતિના અન્ય સભ્યો સાથે એપીએમસી પરિવારના સહયોગથી શુક્રવારના રોજ બજાર સમિતિ પાટણની મુલાકાત લીધી હતી.

બજાર સમિતિની મુલાકાત દરમિયાન ઉપરોક્ત ત્રણેય શાળાના ૪૫૦ થી વધુ વિદ્યાર્થી અને વિદ્યાર્થી નીઓને ચેરમેન સ્નેહલભાઈ પટેલ ધ્વારા બજાર સમિતિ ખેડૂતોને કઈ રીતે ઉપયોગી થાય છે તે વિશે વિસ્તૃત માહિતી આપેલ અને વિધાર્થીઓના મનો રંજન માટે બજાર સમિતિ પાટણના ઓડીટોરીયમ હોલમાં બાળકોને મનોરંજન પુરૂ પાડતા ઝુમાનજી ફિલ્મ બતાવવામાં આવી હતી. ત્યારબાદ બજાર સમિતિ ધ્વારા ગૌરી વ્રત નિમિત્તે તમામ વિદ્યાર્થી ઓને ફરાળી ફુડ પેકેટ વિતરણ કરવામાં આવ્યા હતા.

બજાર સમિતિ પાટણ ખાતે શુક્રવારે ગૌરીવ્રત નિમિત્તે આયોજિત કરાયેલ શહેરની ત્રણેય શાળાના બાળકોએ શાળાના શિક્ષક સ્ટાફ સાથે મનોરંજન મેળવી એપીએમસીની કાર્ય પદ્ધતિ ની જાણકારી સાથે આનંદીત બની એપીએમસી ના ચેરમેન સહિત સમગ્ર બજાર સમિતિ નો આભાર વ્યક્ત કર્યો હતો.

શહેરની ત્રણ સરકારી શાળાના બાળકોએ પાટણ બજાર સમિતિની ગૌરી વ્રત નિમિત્તે લીધેલી મુલાકાત દરમિયાન એપીએમસીના ચેરમેન સ્નેહલભાઈ પટેલ, સેક્રેટરી ઉમેદભાઈ ચૌધરી, સભ્ય ભરતભાઈ પટેલ, રિન્કુભાઇ પટેલ સહિત એપીએમસી સ્ટાફ ઉપસ્થિત રહ્યો હતો.

અહેવાલ યશપાલ સ્વામી