પાટણમાં બે હજાર વર્ષ જુના પાવૈયા પરીવારના માઢનું નવનિર્માણ સાથે વિવિધ દેવી-દેવતાઓની મૂર્તિ પ્રતિષ્ઠા મહોત્સવ ઉજવાયો..

મૂર્તિ પ્રતિષ્ઠા નિમિત્તે યોજાયેલી શોભાયાત્રામાં મોટી સંખ્યામાં પાવૈયા પરિવારના સભ્યો સહિત ધર્મ પ્રેમી નગરજનો જોડાયા..

પાટણ તા. 9
પાટણ શહેરના લોટેશ્વર મહાદેવ મંદિર નજીક આવેલા 2000 વર્ષ જૂના પાવૈયા પરિવારના માઢનું નવ નિર્માણ કરાયા બાદ શનિવારના રોજ માઢ મા શ્રી બહુચર માતાજી,શ્રી મેલડી માતાજી, શ્રી મોગલાણી માતાજી,શ્રી ગાત્રીણી માતાજી અને શ્રી ગોગા મહારાજ ની મૂર્તિ પ્રતિષ્ઠા મહોત્સવ ભક્તિ સભર માહોલમાં ઉજવવામાં આવ્યો હતો.

પાટણના પાવૈયા પરિવાર દ્વારા આયોજિત કરાયેલા મૂર્તિ પ્રતિષ્ઠા મહોત્સવ નિમિત્તે શહેરના ગોળ શેરી સ્થિત નૂતન હાઇસ્કુલ ખાતેથી તમામ પ્રતિમાઓની ભક્તિ સંગીતના સુરો વચ્ચે ભવ્ય શોભાયાત્રા પ્રસ્થાન પામીને દોશીવટ બજાર બાબુના બંગલા થઈ લોટેશ્વર મહાદેવ નજીક આવેલ પાવૈયા ના મઠ ખાતે સંપન્ન બની હતી શોભા યાત્રા માં જોડાયેલા ભાવિક ભક્તોએ રાસ ગરબાની રમઝટ બોલાવી માતાજીના ગુણગાન ગાઈ ધન્યતા અનુભવી હતી.

પાવૈયા ના માઢ ખાતે આયોજિત કરાયેલા મૂર્તિ પ્રતિષ્ઠા મહોત્સવ ના ઉપ્લક્ષમાં હવન યજ્ઞ સહિતના ધાર્મિક પ્રસંગો ઉજવવામાં આવ્યા હતા. જેમાં યજમાન પરિવારની સાથે પાલનપુરના ગીતા દાદી, મેલુ ગામના ભાવના દાદી,ડીસાના રૂપામાંતેમજ પાટણના અલકા માસી સહિત પાવૈયા પરિવારના સભ્યો મોટી સંખ્યામાં ઉપસ્થિત રહ્યા હતા. આ ધાર્મિક પ્રસંગની શાસ્ત્રોક વિધિ પાટણના જયેશભાઈ પંડ્યા સહિતના ભૂદેવો દ્વારા સંગીતમય શૈલી વચ્ચે કરવામાં આવી હતી.

અહેવાલ યશપાલ સ્વામી