પવિત્ર અધિક માસ નિમિત્તે પાટણના શ્રી ગોપીનાથ મંદિર પરિસર ખાતે લગ્ન મનોરથનું ભવ્ય આયોજન કરાયું..

પાટણના ધર્મ પ્રેમી નગરજનો એ લગ્ન મનોરથના દર્શનનો લાભ લઇ ભગવાન શ્રી ગોપીનાથજીના રૂડા આશીર્વાદ મેળવી ધન્યતા અનુભવી..

પાટણ તા. 29 ધમૅ ની નગરી પાટણ શહેરમાં દરેક ધર્મના તહેવારોની ભક્તિ સભર માહોલમાં ઉજવણી કરવામાં આવતી હોય છે ત્યારે પવિત્ર અધિક માસમાં શહેરના સોનીવાડા વિસ્તારમાં આવેલા ગોપીનાથ મંદિર ખાતે વિવિધ મનોરથો સાથે ધાર્મિક ઉત્સવોની ઉજવણી કરવામાં આવી રહી છે જેને અનુલક્ષીને શનિવારના રોજ વિવિધ મનોરથ પૈકી લગ્ન મનોરથનુ સુંદર આયોજન કરવામાં આવ્યું હતું.

ગોપીનાથ મંદિર પરિસર ખાતે આયોજિત કરાયેલા લગ્ન મનોરથના આ સુંદર પ્રસંગના દર્શન પાટણ શહેરની ધર્મ પ્રેમી જનતા માટે સાંજે ૫.૩૦ થી રાત્રિના ૮.૩૦ કલાક સુધી ખુલ્લા રાખવામાં આવ્યા હતા જેનું મોટી સંખ્યામાં પાટણની ધર્મ પ્રેમી જનતાએ લાભ લઈ ભગવાન ગોપીનાથજીના આશીર્વાદ મેળવી ધન્યતા અનુભવી હતી.

શ્રી ગોપીનાથ મંદિર પરિસર ખાતે આયોજિત કરાયેલા લગ્ન મનોરથના આ ધાર્મિક પ્રસંગને સફળ બનાવવા મંદિરના સંચાલક પરિવાર સહિત ભક્તજનો દ્વારા જહેમત ઉઠાવવામાં આવી હતી.