બોલ મારી અંબે જય જય અંબે ના ગગન ભેદી નાદ વચ્ચે પાટણના સંધો એ અંબાજી તરફ પ્રયાણ કર્યુ.

બગવાડા દરવાજા ખાતે પદયાત્રીઓને પ્રસ્થાન કરાવવા આવેલા અબાલ વૃદ્ધ સૌએ બોલ માડી અંબેનો જયઘોષ કરી પદયાત્રીઓને પ્રસ્થાન કરાવ્યું..

“અંબાજી દુર હૈ…. જાના જરૂર હે બોલ મારી અંબે જય જય અંબે ના નાદ સાથે પદયાત્રીઓએ રાસ ગરબાની રમઝટ બોલાવી..

પાટણ તા. 25 સુપ્રસિધ્ધ યાત્રાધામ અંબાજી ખાતે ભાદરવી પૂનમનો ભવ્ય લોકમેળો ભરાયો છે. લાખોની સંખ્યામાં શ્રધ્ધાળુઓ માં જગદંબાના દર્શન માટે પગપાળા સંધો સાથે અંબાજી તરફ પ્રયાણ કરી રહ્યા છે. ત્યારે ભાદરવા સુદ નોમ ની રાત્રે પાટણ માંથી અનેક સંઘોએ માં જગદંબાના જય જયકાર સાથે હજારોની સંખ્યામાં અંબાજી તરફ પ્રયાણ કર્યું હતું.

અંબાજી ખાતે ભરાતા ભાદરવા સુદ-પૂનમના મેળામાં પાટણ જિલ્લામાંથી દર વર્ષે હજારોની સંખ્યામાં માં ના ભકતો પગપાળા ચાલીને જગત જનની ના ચરણોમાં શીશ નમાવવા માટે જાય છે. ચાલુ સાલે પણ હજારો માઈભક્તોએ માતાજીના રથડા લઈ બોલ મારી અંબે જય જય અંબેના જયકાર સાથે અંબાજી જવા માટે પ્રસ્થાન કર્યું હતું.

રવિવાર ની રાત્રે પાટણ શહેર ના ઝીણીપોળ વિસ્તારનો પગપાળા યાત્રા સંધ 26 માં વર્ષે 50 પદયાત્રીઓ સાથે માતાજીનો રથ લઈને નીકળ્યા હતા.તો ગુર્જરવાડા યુથ કલબ, નાગર લીમડી યુવક મંડળ, બી.એસ.પી. યુવક મંડળ, શાહના પાડાનો મણિભદ્ર યુવક મંડળ, રાજપુર યુવક મંડળ, દ્વારકાધીર યુવક મંડળ, કસારવાડા યુવક મંડળ, અનાવાડા પાટીદાર યુથ કલબ વગેરે મંડળો એ માતાજીની માડવીઓ સાથે બોલ મારી અંબે જય જય અંબેના નાદ સાથે ગરબે ઘૂમતા ઘૂમતા બગવાડા દરવાજા ખાતે આવ્યા હતા.

તમામ સંઘો બગવાડા ચોકમાં એકઠા થતાં ધાર્મિક મેળાવડો જામ્યો હતો.ભક્તોએ માં જગદંબાનો જય જય કાર કરી અંબાજીના માર્ગો તરફ પ્રયાણ કર્યું હતું. સંઘોને વળાવવા માટે આવેલા અબાલ વૃધ્ધ સૌએ પદયાત્રીઓ ની પદયાત્રા સફળ બની રહે તેવી કામના સાથે પ્રસ્થાન કરાવ્યું હતું. બગવાડા દરવાજા ખાતે પદયાત્રીઓ એ ભક્તિ સંગીત ના સુરો વચ્ચે રાસ ગરબાની પણ રમઝટ બોલાવી હતી.

અહેવાલ યશપાલ સ્વામી