પાટણની શ્રીમંત ફતેસિંહરાવ પુસ્તકાલય ખાતે કોમ્પ્યુટર કોર્સનો પ્રારંભ કરાયો..

પાટણ તા. 5 પાટણની ઐતિહાસિક શ્રીમંત ફત્તેહસિંહરાવ સાર્વજનિક પુસ્તકાલય દ્વારા આયોજિત શ્રીમતી હર્ષાબેન ભરતભાઇ શાહના સૌજન્યથી રાહત દરે કોમ્પ્યુટરના વિવિધ કોર્ષની નવિન બેચનો શુભારંભ કરવામાં આવ્યો હતો. સંસ્થાના પ્રમુખ ડૉ. શૈલેશભાઈ સોમપુરા દ્વારા સૌ વિદ્યાર્થીઓને આવકારી પુસ્તકાલયની વિવિધ સેવા પ્રવૃતિઓની માહિતી આપી તેમની કારકિર્દી માટે વિવિધ ક્ષેત્રોમાં કોમ્પ્યુટરની ઉપયોગીતા વિશે જણાવી વર્ગમાં કોમ્પ્યુટર ચીવટતાથી શીખવા અને જે બાબતમાં ખ્યાલ ન આવે તે કોમ્પ્યુટર ઇન્સ્ટ્રક્ટર ને નિ:સંકોચ પૂછવા, શિસ્ત અને નિયમિતતા જાળવવાની સલાહ આપી આશિર્વચન આપ્યા હતા.

આ પ્રસંગે ઉપપ્રમુખ સુનિલભાઈ પાગેદાર દ્વારા વિદ્યાર્થીઓને કારકિર્દી માટે કોમ્પ્યુટરનું મહત્વ સમજાવી ગૂગલના પાયાના જ્ઞાન સ્ત્રોત એવા ગુજરાત સરકારના વિશિષ્ઠ ગ્રંથાલય પુસ્તકાલયના વાંચક સભ્ય બની પુસ્તકોનો લાભ લેવા અનુરોધ કર્યો હતો. પુસ્તકાલયના ખજાનચી, રાજેશભાઈ પરીખ દ્વારા વિદ્યાર્થીઓને કોમ્પ્યુટર ક્લાસમાં સફળતા મેળવવા શુભેચ્છાઓ પાઠવી આભાર વ્યક્ત કર્યો હતો.

અહેવાલ યશપાલ સ્વામી