સાતલપુરના ફાગલી માગૅ પર ઘાસચારો ભરીને જઈ રહેલી લોડીંગ ગાડી માગૅ પરના વીજવાયર અડકી જતા ભડભડ સળગી…

ગાડીમાં લાગેલી આગની ઘટનાના પગલે ચાલકની સમયસૂચકતાના કારણે જાન હાની ટળી…

હાઇવે માર્ગો પર ઝૂલતા વાયરોનું જીઈબી તંત્ર દ્વારા મેન્ટેનન્સ હાથ ધરવા લોક માંગ ઉઠી..

પાટણ તા. ૨૬
પાટણ જિલ્લાના હાઇવે માર્ગો પર પસાર થતા વીજ વાયરો નું મેન્ટેનન્સ કામ જીઈબી વિભાગના અધિકારી ઓ અને કર્મચારીઓ દ્વારા સમયસર ન થતું હોવાના કારણે માર્ગો પર ઝૂલતા વાયરો ક્યારેક અકસ્માતો સર્જતા હોવાના કિસ્સાઓ અવારનવાર પ્રકાશમાં આવતા હોય છે. ત્યારે આવો જ એક કિસ્સો પાટણ જિલ્લાના સાતલપુર તાલુકાના ફાગલી ખાતેથી ઘાસચારો ભરીને માગૅ પર થી પસાર થઈ રહેલ લોડિંગ ગાડીને અડકી જતા શોર્ટ સર્કિટ સર્જાવા પામી હતી જેના કારણે લોડિંગ ગાડીમાં ભરેલ ઘાસચારા સાથે ગાડી ભડભડ સળગી ઉઠતા માર્ગ પર અફરા તફરી નો માહોલ સર્જાયો હતો.જોકે ચાલકની સમય સૂચકતા ના કારણે કોઈ જાનહાની ન થતા લોકોએ હાશકારો અનુભવ્યો હતો.

આ બનાવની મળતી હકીકત મુજબ સોમવારની સાંજે પાટણ જિલ્લાના સાતલપુર તાલુકાના ફાગલી ગામ નજીકથી ઘાસચારો ભરેલી લોડીંગ ગાડી પસાર થઈ રહી હતી ત્યારે માર્ગ પર ઝૂલતા હેવી વીજ વાયર ગાડીમાં ભરેલા ઘાસચારાને અડકી જતા શોર્ટ સર્કિટ થવા પામ્યો હતો જેના કારણે ગાડીમાં ભરેલ ઘાસચારો ભડભડ સળગી ઊઠતા અને બનાવની જાણ ગાડી ચાલકને થતા તેઓએ સમય સૂચકતા વાપરી ગાડીને રોડ સાઈડ કરી પોતે ગાડીમાંથી ઉતરી જતા જાનહાની ટળી હતી.

જોકે આ શોર્ટ સર્કિટના કારણે ગાડીમાં ભરેલ તમામ ઘાસચારા સાથે ગાડી પણ બળીને રાખ થતા મોટું નુકસાન થવા પામ્યું હતું. હાઇવે માર્ગ પર ચાલુ ગાડીએ શોર્ટ સર્કિટના કારણે સર્જાયેલી ઘટનાના પગલે લોકો માં અફરાતફરી મચી જવા પામી હતી. અને લોકોના ટોળેટોળા ઘટના સ્થળે ઊંમટી પડ્યા હતા. જોકે આ બનાવની પોલીસ ફરિયાદ થઈ હોવાનું આ લખાય છે ત્યાં સુધી જાણી શકાયું નથી.

અહેવાલ યશપાલ સ્વામી