પા પા પગલી પ્રોજેક્ટ અંતર્ગત સમી માર્કેટયાર્ડ ખાતે ભુલકા મેળાનું આયોજન કરાયું..

પાટણ તા. ૧
સમી માર્કેટયાર્ડ ખાતે પાટણ જિલ્લા પંચાયત પ્રમુખ હેતલબેન ઠાકોરના અધ્યક્ષ સ્થાને શુક્રવારે ભુલકા મેળા નું આયોજન કરવામાં આવ્યું હતુ. ભુલકા મેળામાં મહિલા અને બાળ વિભાગ ગુજરાત સરકાર દ્વારા પૂર્વ પ્રાથમિક શિક્ષણના પ્રોજેક્ટ પા-પા પગલી અંતર્ગત આંગણવાડીના 3 થી 6 વર્ષના બાળકોના વિકાસ ને ધ્યાનમાં રાખીને શિક્ષણની વાત, વાલીઓ સાથેનો સંવાદોત્સવ કાર્યક્રમ યોજવામાં આવ્યો હતો. આ ભુલકા મેળાએ બધાને પોતાનું બાળપણ યાદ કરાવ્યું હતુ.

જિલ્લા પંચાયત પ્રમુખ નાના બાળકોનાં પ્રોગ્રામ જોઇને ખુબજ ભાવવિભોર અને આનંદિત થયા હતા. તેઓએ જણાવ્યું હતુ કે, ટી.એલ.એમ. દ્વારા જે પૂર્વ પ્રાથમિક શિક્ષણ આપવામાં આવી રહ્યું છે તે અંતર્ગત ખૂબજ સુંદર કામગીરી થઇ રહી છે. બાળકોનાં જીવન ધડતર માટે સર્જનાત્મક પવૃતિ સાથે સાંસ્કૃતિક પ્રોગ્રામ થકી પણ ભૂલકાઓને માર્ગદર્શન મળી રહે છે. ભૂલકા મેળામાં ઉપસ્થિત રાધનપુર ધારાસભ્ય લવિંગ જી ઠાકોરએ બાળકો અને આંગણવાડીની ખૂબ જ પ્રશંસા કરી હતી. તેમજ જણાવ્યું હતુ કે, પા પા પગલી પ્રોજેક્ટ અંતર્ગત 17 થીમ આધારીત જે પૂર્વ પ્રાથમિક શિક્ષણ અપાઇ રહ્યુ છે તે ખુબ આવકાર દાયક છે. જે બાળકના સર્વાંગી વિકાસ માટે સરકારના નવતર અભિગમનો સ્વીકાર કરે છે.

આ વાલી સાથે સંવાદમાં વિવિધ સાંસ્કૃતિક કાર્યક્રમો આંગણવાડીના બાળકો દ્વારા કરવામાં આવ્યા હતા. તેમજ ઉપસ્થિત મહેમાનો દ્વારા કાર્યક્રમમાં ભાગ લીધેલ બાળકોને રૂ. 14,600 જેટલી રકમ આપીને પ્રોત્સા હીત કરવામાં આવ્યા હતા. જિલ્લા કક્ષાએ શ્રેષ્ઠ કામગીરી કરનાર આંગણવાડી બહેનો, અને બાળકો નું મોમેન્ટો – પ્રમાણપત્ર આપી સન્માન કરવામાં આવ્યું હતુ. આ કાર્યક્રમમાં જિલ્લા પંચાયત પ્રમુખ હેતલ બેન વેરશીજી ઠાકોર, ધારાસભ્ય રાધનપુર લવિંગજી ઠાકોર, જિલ્લા પંચાયત મહિલા અને બાળ કલ્યાણ સમિતિનાં ચેરમેન ભારતીબેન દિનેશભાઇ ચૌધરી, સિંચાઇ સમિતિનાં ચેરમેન બાબુજી ઠાકોર, તાલુકા પંચાયત નાં પ્રમુખ, આગેવાન કનુભાઇ સિંધવ, તાલુકા વિકાસ અધિકારી, THO, તેમજ વિવિધ વિભાગો નો તમામ સ્ટાફ ઉપસ્થિત રહ્યો હતો.

અહેવાલ યશપાલ સ્વામી