પાટણ જિલ્લામાં આવશ્યક સેવાઓના મતદારો પોસ્ટલ બેલેટ દ્વારા મતદાન કરીને લોકશાહીના અવસરમાં સહ ભાગી બને…

અધિક નિવાસી કલેક્ટરના અધ્યક્ષ સ્થાને પોસ્ટલ બેલેટ મતદારો ની બેઠક મળી..

પાટણ તા. ૨૮
લોકસભા સામાન્ય ચૂંટણી-2024 માં મતદાનની ટકાવારી વધે તેમજ નાગરિકો ઉત્સાહભેર મતદાન કરવા પ્રેરાય એવા ઉદ્દેશથી કેન્દ્રીય ચૂંટણીપંચ દ્વારા અનેક પ્રયત્નો કરવામાં આવી રહ્યા છે. સરકારી કર્મચારીઓ અને અન્ય સંસ્થાઓ સાથે જોડાયેલા લોકો મતપત્રથી મતદાન કરી શકે તે માટે 12-D ફોર્મ બહાર પાડવા માં આવ્યું છે. આ ફોર્મ ભરીને સરકારી કર્મચારીઓ પોતાના મતવિસ્તારમાં જઈને મતપત્ર દ્વારા મતદાન કરી શકશે. જેના અનુસંધાને પાટણ જિલ્લા સેવા સદન ખાતે નિવાસી અધિક કલેક્ટર બી.એસ.પટેલના અધ્યક્ષ સ્થાને ગુરૂવારે બેઠક મળી હતી. બેઠકમાં વિવિધ વિભાગના અધિકારીઓને પોતાના કર્મચારીઓ માટે 12-D ફોર્મની વ્યવસ્થા કરીને તેઓ અચુક મતદાન કરે તે નિશ્ચિત કરવા માટે નિવાસી અધિક કલેક્ટરે જણાવ્યું હતુ.

ભારતીય ચૂંટણી પંચ દ્વારા બહાર પાડવામાં આવેલ નોટીફીકેશન મુજબ ગુજરાતના કુલ 12 વિભાગો અન્વયે પાટણ જિલ્લાના વિજળી વિભાગ, બીએસએનએલ, ઉડ્ડયન વિભાગ, ઓલ ઈન્ડિયા રેડિયો,રેલ્વે, આરોગ્ય વિભાગ ગુજરાત,ગુજરાત રાજ્ય માર્ગ પરિવહન નિગમની લાંબા અંતરની બસ સેવાઓ, ફાયર સર્વિસીસ, ચૂંટણી દિવસના કવરેજ માટે ECI દ્વારા અધિકૃત મીડિયા પર્સન, ટ્રાફિક પોલીસ, અને એમ્બ્યુલન્સ સેવા વગેરેની આવશ્યક સેવાઓમાં જોડાયેલ અધિકારીઓ-કર્મચારીઓની સંખ્યા મુજબ પુરા પાડવામાં આવેલ ફોર્મ નં-12-Dમાં પુરતી વિગતો ભરી તા.17.04.2024 સુધીમાં જરૂરી ડોક્યુમેન્ટ સાથે મદદનીશ ચૂંટણી અધિકારીની કચેરીમાં રજૂ કરવા માટે બેઠકમાં જણાવવામાં આવ્યું હતુ.

કેન્દ્રીય ચૂંટણી પંચ દ્વારા આવશ્યક સેવાઓમાં ફરજ બજાવતા વિભાગોની યાદી આપવામાં આવી છે. આ યાદી પ્રમાણે જેઓ મતદાનના દિવસે ચૂંટણી ફરજમાં રોકાયેલા હોય અને મતદાન કરવા ન જઈ શકતા હોય તેવા અધિકારીઓ-કર્મચારીઓએ 12-D ફોર્મ ભરવા માટે જણાવવામાં આવ્યું છે જેથી તેઓ મતદાન થી વંચિત ન રહી જાય. 12-D ફોર્મ ભર્યા બાદ જાહેરનામું પ્રસિદ્ધ થાય તેના 5 દિવસમાં આ ફોર્મ સંલગ્ન વિધાનસભા મદદનીશ ચૂંટણી અધિકારીને મોકલી આપવાનું રહેશે. ત્યારબાદ જ મતદાર પોતાના મત વિસ્તાર માં જઈને પોસ્ટલ બેલેટથી મતદાન કરી શકશે. આ બેઠકમાં નિવાસી અધિક કલેક્ટર, નાયબ જિલ્લા ચૂંટણી અધિકારી,તેમજ વિવિધ વિભાગોના અધિકારીઓ ઉપસ્થિત રહ્યા હતા.

અહેવાલ યશપાલ સ્વામી