જિલ્લાનાં 0 થી 5 વર્ષના બાળકોને પોલિયોનાં ટીપા અવશ્ય પીવડાવવાં પાટણ કલેક્ટરની અપીલ.

પાટણ તા. ૨૪
“બાળ લકવા નાબૂદી અભિયાન-2024” અન્વયે નેશનલ ઈમ્યુનાઈઝેશન ડે. 23 જૂન 2024 અંતર્ગત પાટણ જિલ્લાના 0 થી 5 વર્ષના બાળકોને પોલિયો રસીના બે ટીપા પીવડાવવામાં આવ્યા હતા. જેનાં બીજા દિવસે જિલ્લા કલેક્ટર અરવિંદ વિજયને પોતાના દિકરાને પોલિયો નાં ટીપા પીવડાવ્યા હતા. આ સાથે જ કલેક્ટરે પાટણ જિલ્લાની જનતાને પોતાના બાળકોને પોલિયો ના ટીપા પીવડાવવા માટે અપીલ કરી હતી.

કલેક્ટરે અપીલ કરતા જણાવ્યું હતુ કે, મેં મારા દિકરાને પોલીયોની રસીના બે ટીપા પીવડાવ્યા હતા અને જિલ્લામાં 0 થી 5 વર્ષનું એક પણ બાળક રસીથી વંચિત ના રહે તે માટે પાટણ જિલ્લાના તમામ લોકોને અપીલ કરું છું કે, આપનું કે આપના આજું બાજુનું કોઈ બાળક પોલિયોની રસીના બે ટીપા પીધા વગર ના રહી જાય તે માટે ખાસ તકેદારી રાખવા અનુરોધ કરું છું.

હવે તા. 24 અને 25 જૂન 2024 ના રોજ આરોગ્ય ટીમ દ્વારા દરેક ઘરોની મુલાકાત લઈ જે બાળકો પ્રથમ દિવસે પોલિયો રસીના બે ટીપાથી વંચીત રહી ગયેલ છે તેવા તમામ બાળકોને ઘરે ઘરે જઈને પોલિયો રસીના બે ટીપા પીવડાવી રક્ષિત કરવાનું આયોજન કરેલ છે. તેની અંદર સહયોગ કરવા પાટણ જિલ્લાના તમામ નાગરીકોને કલેક્ટરે વિનંતિ કરી છે.

અહેવાલ યશપાલ સ્વામી