સિદ્ઘપુરની શ્રી અભિનવ હાઈસ્કૂલ ખાતે મહિલાઓની જાતીય સતામણી અધિનિયમની જાગૃતિ અર્થે સેમિનાર યોજાયો..

પાટણ તા. ૨૮
પાટણ જિલ્લા મહિલા અને બાલ અધિકારીની કચેરી અને પાટણ જિલ્લા શિક્ષણ અધિકારી કચેરી આયોજિત કામકાજના સ્થળે મહિલાઓની જાતીય સતામણી અધિનિયમ – 2013 અંતર્ગત માર્ગદર્શન હેતુ સેમિનાર સિદ્ધપુરની શ્રી અભિનવ હાઈસ્કૂલ ખાતે યોજવામાં આવ્યો હતો. જેમાં સિદ્ધપુર તાલુકાની તમામ ગ્રાન્ટેડ શાળાઓના 70 જેટલા શિક્ષિકા બહેનો ઉપસ્થિતિ રહ્યા હતા.

સેમિનારમાં પાટણ જિલ્લા શિક્ષણાધિકારી ડૉ. અશોકભાઈ ચૌધરી, જિલ્લા શિક્ષણ નિરીક્ષક (ઈ.આઈ.) શ્રીમતી ડૉ. મધુબેન દેસાઈ, જિલ્લા મદદનીશ શિક્ષક નિરીક્ષક (એ.ઈ.આઈ.) કનુભાઈ ચૌધરી અને શ્રીમતી વિપુલાબેન પટેલ, દહેજ પ્રતિબંધક સહરક્ષણ અધિકારી મુકેશ ભાઈ પટેલ, જિલ્લા મહિલા અને બાલ અધિકારી શ્રીમતી ડૉ. મેઘનાબેન ગોસ્વામી અને વિદ્યાલય ના પ્રધાનાચાર્ય ડૉ. રુપેશ ભાઈ ભાટિયાએ દીપ પ્રાગટ્ય કરીને સેમિનારનો પ્રારંભ કર્યો હતો.

ત્યારબાદ વિદ્યાલયની શિક્ષિકા બહેનોએ સરસ્વતી વંદના કરાવી હતી. વિદ્યાલયના પ્રધાનાચાર્ય ડૉ. રૂપેશભાઈ ભાટિયાએ તમામ ઉપસ્થિત મહાનુભાવો તથા શિક્ષિકા બહેનોનું શાબ્દિક સ્વાગત કર્યું હતું તેમજ નારી શક્તિ વિષયક કાવ્ય પંક્તિ રજૂ કરી સૌનું સ્વાગત કર્યું હતું. ત્યાર બાદ સર્વે મહેમાનોનું સાલ, પુસ્તક અને પુષ્પગુચ્છ દ્વારા સ્વાગત કરવામાં આવેલ.

જિલ્લા શિક્ષણ અધિકારી ડૉ. અશોકભાઈ ચૌધરીએ તેમના ઉદ્બોધનમાં કહ્યું કે આ સેમિનાર માંથી મળેલું ભાથું પોતા ના વિદ્યાલયમાં જઈને સ્ટાફ સાથે ચર્ચા કરીએ તેમજ જાતીય સતામણી અટકાવીએ. દહેજ પ્રતિ બંધક સહરક્ષણ અધિકારી મુકેશભાઈ પટેલે કામકાજના સ્થળે મહિલાઓની જાતીય સતામણી અધિનિયમ 2013 તથા પોક્સો એકટની વિસ્તૃત ઉદાહરણ સહિત સમજ આપી હતી. પાટણ લૉ કોલેજ ના પ્રાધ્યાપિકા ડૉ. અવનીબેન આલે કર્મચારી તરીકે બહેનોને પડતી મુશ્કેલીઓ અને તેમના રોજિંદા પ્રશ્નો બાબતે ઉદાહરણથી છણાવટ કરી હતી.

પાટણ જિલ્લાના શિક્ષણ નિરીક્ષક શ્રીમતી ડૉ. મધુબેન દેસાઈએ શિક્ષિકા બહેનોની શાળામાં જાતીય સતામણી બાબતે તથા બહેનોની કામગીરી વિશે ભારપૂર્વક જણાવ્યું હતું. ત્યારબાદ જિલ્લા મહિલા અને બાલ અધિકારી શ્રીમતી ડૉ. મેઘનાબેન ગોસ્વામીએ મહિલાઓ અને કન્યાઓની વિવિધ યોજનાઓની સમજ આપી હતી. કાર્યક્રમના અંતે વાલજીભાઈ ચૌધરી
એ આભાર વિધિ કરી હતી.

અહેવાલ યશપાલ સ્વામી