પાટણ રોટલીયા હનુમાનના સાનિધ્યમાં પ્રથમવાર કિર્તીદાનના સથવારે રોટલીયોત્સવ યોજાશે.

કીર્તિદાનના લોકડાયરામાં જીવદયા માટે પૈસા નહિ પરંતુ રોટલો કે 10 રોટલી થી એન્ટ્રી મળશે..

ડાયરા દરમિયાન એકત્ર કરાયેલ રોટલી રોટલા શહેરની ગૌશાળા, પાંજરા પોળ અને રખડતા ઢોરોને અર્પણ કરાશે.

પાટણ તા.5
સમગ્ર રાજ્યમાં સૌપ્રથમવાર પાટણ ખાતે રોટલીયા હનુમાનજી મંદિરની પ્રથમ વર્ષગાંઠ ઉજવણી પ્રસંગે મૂંગા પશુઓને એક દિવસ માટે ભોજન કરાવવાના ઉદ્દેશથી કિર્તીદાન ગઢવી ના સથવારે રોટલીયોત્સવનુ આયોજન કરાયું છે.

કીર્તિદાન ગઢવીના લોક ડાયરામાં પ્રવેશ માટે પ્રેક્ષકો પાસેથી ટિકિટ રૂપે પૈસાના બદલે રોટલા કે 10 રોટલી લેવા માં આવશે. રાજ્યમાં એકમાત્ર મુંગા પશુઓ માટે પાટણ ખાતે સ્થાપિત કરવામાં આવેલા શ્રી રોટલીયા હનુમાનદાદા ના મંદીર ની તા. 16 એપ્રિલ 2022ના રોજ સ્થાપના કરવામાં આવી હતી અને આ મંદિરમાં રોટલીયા હનુમાનદાદાને પ્રસાદ રૂપે માત્ર ઘરે બનાવેલ રોટલા કે રોટલીની જ પ્રસાદી ચડે છે. ત્યારે મંદિરને આગામી તા. 16 એપ્રિલ 2023ના રોજ એક વર્ષ પૂર્ણ થઈ રહ્યું હોય જીવ દયા પ્રેમી આયોજકો દ્વારા પ્રથમ વાર્ષિક પાટોત્સવની ઉજવણીની અનોખી રીતે ઉજવણી કરવામાં આવનાર છે.

પ્રથમ વાર્ષિક પાટોત્સવને લઈને જાણીતા કલાકાર કિર્તીદાન ગઢવી નો ભવ્ય લોક ડાયરાનો પોગ્રામ આયોજિત કરવામાં આવ્યો છે. જે પ્રોગ્રામમાં પ્રવેશ મેળવનાર વ્યક્તિએ પૈસા નહીં પરંતુ એક રોટલો અથવા 10 રોટલી આપીને પ્રવેશ મેળવવાનો રહેશે. ડાયરા દરમિયાન એકત્ર કરાયેલી રોટલી રોટલા અબોલ ઢોરને ખવડાવશે તેવું રોટલી હનુમાન મંદિર પરિષરના સેવાભાવી આયોજક સ્નેહલભાઈ પટેલે જણાવી અંદાજે 25 હજાર કિલો રોટલા રોટલી એકત્રિત કરવા નું આયોજન હોવાનું તેઓએ જણાવ્યું હતું.

ડાયરાના કાર્યક્રમ દરમિયાન એકત્ર કરાયેલા રોટલી રોટલા ડાયરાની રાત્રે અથવા બીજા દિવસે શહેરની વિવિધ ગૌશાળાઓ, પાંજરા પોળો સહિત રખડતા ઢોરને ભોજન સ્વરૂપે અપૅણ કરાશે તેવુ રોટલીયા હનુમાન મંદિર પરિસરના સેવાભાવી સેવકો એ જણાવ્યું હતું.