પાટણના બેબાભાઈ શેઠ પરિવાર દ્વારા પદયાત્રીઓ માટે ચોખા ઘી નો શીરો અને મગ નો પ્રસાદ કેમ્પ…

છેલ્લા 33 વર્ષથી સેવા કેમ્પનું આયોજન કરાઈ છે..

પાટણ તા. 26 ભાદરવી પૂનમ ના અંબાજી ખાતે ભરાતા મીની કુંભમેળામાં લાખો પદયાત્રીઓ પગપાળા યાત્રા સંઘ લઈને માતાજીની માંડવીઓ સાથે ભક્તિ સંગીતના સુરો વચ્ચે બોલ મારી અંબે જય જય અંબે અંબાજી દૂર હે જાના જરૂર હે ના ગગન ભેગી નાદ વચ્ચે અંબાજી તરફ પ્રયાણ કરી રહ્યા છે. ત્યારે પદયાત્રીઓને અંબાજીના માર્ગ પર કોઈપણ પ્રકારની મુશ્કેલી ઉભી ન થાય તે માટે વિવિધ સેવાકીય સંસ્થાઓ દ્વારા સેવા કેમ્પો કાર્યરત બનાવવામાં આવ્યા છે ત્યારે પાટણના જાણીતા બિલ્ડર અને બેબા શેઠના હુલામણા નામથી ઓળખાતા ગોરધનભાઈ ઠક્કર દ્વારા છેલ્લા 33 વષૅથી કરાતાં સેવા કેમ્પનું ચાલુ વર્ષે પણ ગોળા ગામ નજીક ચોખ્ખા ઘી નો શીરો તેમજ મગના પ્રસાદનો સેવા કેમ્પ કરવામાં આવ્યો છે.

આ સેવા કેમ્પમાં પદયાત્રીઓને ડાઇનિંગ ટેબલ ની સુવિધા સાથે ચોખા ઘીનો શીરો અને મગ પીરસવામાં આવી રહ્યા છે. બેબાશેઠ દ્વારા આયોજિત કરાયેલા મગ અને શીરાના આ સેવા કેમ્પનો હજારો પદયાત્રીઓ લાભ લઇ રહ્યા છે. દરરોજ 12 થી 15 ઘાણ ચોખ્ખા ઘીનો શીરો પદયાત્રીઓને પીરસવામાં આવી રહ્યો છે. આ સેવાકીય પ્રવૃત્તિમાં પાટણના અગ્રણી વેપારી અને પાટણ નગર પાલિકાના પૂર્વ પ્રમુખ હેમંતભાઈ તન્ના, યતીનભાઇ ગાંધી, આર સી પટેલ, ઘનશ્યામભાઈ પટેલ, ભરતભાઈ જીવાભાઇ પટેલ સહિતના સેવાભાવી યુવા કાર્યકર્તાઓ પણ અંબાજી જતા પદયાત્રીઓની સેવા કરી ધન્યતા અનુભવી રહ્યા છે.

બેબાભાઈ શેઠના આ સેવા કેમ્પમાં ચોખ્ખા ઘીનો શીરો અને મગના પ્રસાદની સાથે સાથે ગરમાગરમ ચા, સેવ મમરા, મિનરલ પાણી, નાહવા ધોવાની અને આરામ કરવાની સુવિધા તેમજ મેડિકલ ની સેવા પણ ઉપલબ્ધ બનાવામાં આવી હોય જેનો પણ પદયાત્રીઓ લાભ લઈ આ સેવા કેમ્પ કરવા બદલ બેબાભાઈ શેઠ અને તેમના મિત્ર વર્તુળના સેવા કાયૅ ને સરાહી રહ્યા છે.

અહેવાલ યશપાલ સ્વામી