પાટણ જિલ્લા પંચાયત નું રૂ. ૨૨૮ કરોડની પુરાંત વાળુ અંદાજપત્ર સવૉનું મતે મંજૂર કરાયું…

પાટણ તા. ૭
પાટણ જિલ્લા પંચાયત પાટણની સામાન્ય સભાની બેઠક પ્રમુખની અધ્યક્ષતા યોજાઇ હતી.જેમાં પાટણ જિલ્લા પંચાયતનું સને ૨૦૨૩- ૨૪ ના વર્ષનું સુધારેલ તેમજ ૨૦૨૪- ૨૫ના વર્ષનું રૂપિયા ૨૨૮ કરોડની પુરાંત દર્શાવતું અંદાજપત્ર સર્વાનુમતે મંજૂર કરવામાં આવ્યું હતું. જિલ્લા પંચાયત પ્રમુખે બજેટમાં જિલ્લાના વિકાસના તમામ ક્ષેત્રોને આવરી લેતી જોગવાઈઓ કરી હોવાનું જણાવી બજેટને વિકાસલક્ષી ગણાવ્યું હતું. આ ઉપરાંત પાટણ જિલ્લા પંચાયત સામાન્ય સભાના એજન્ડા પરના અન્ય મુદ્દાઓ પર ચર્ચા વિચારણા કરી મંજૂર કરવામાં આવ્યા હતા. પાટણ જિલ્લા પંચાયતની ખાસ સામાન્ય સભામાં જિલ્લા પંચાયત પ્રમુખે તેમના પ્રમુખ તરીકેના કાર્યકાળ દરમિયાનનું પ્રથમ વાર્ષિક અંદાજપત્ર રજૂ કર્યું હતું. અંદાજપત્રમાં સ્વભંડોળ, સરકારી પ્રવૃત્તિઓ અને દેવા વિભાગ મળી કુલ ૧૫૨૭ કરોડની આવક અને તેની સામે ₹૧૨૯૯ કરોડના ખર્ચની જોગવાઈ| કરીને રૂપિયા ૨૨૮ કરોડની પુરાત દર્શાવવામાં આવી હતી.

જિલ્લા પંચાયતના વર્ષ ૨૦૨૪ ૨૫ ના વાર્ષિક અંદાજપત્રમાં સ્વભંડોળમાંથી જિલ્લા પંચાયતના પદાધિકારી ઓ માટે પ્રેરણા પ્રવાસ કાર્યક્રમ અંતર્ગત પ્રથમવાર રૂ. ૫ લાખની જોગવાઈ કરવામાં આવી છે. તે ઉપરાંત પાટણ જિલ્લા પંચાયતમાં જનસુવિધા કેન્દ્રની વ્યવસ્થા ઉભી કરવા રૂ. ૮.૨૫ લાખ તેમજ જિલ્લા પંચાયત ભવન અને જિલ્લા પંચાયતના કવાર્ટસમાં સોલાર સિસ્ટમ માટે પણ રૂપિયા ૧૦ લાખની જોગવાઈ કરવા માં આવી છે. આમ એકંદરે જોતા જિલ્લા પંચાયતના વાર્ષિક અંદાજપત્રમાં સ્વભંડોળ ક્ષેત્રમાં પંચાયત પાછળ કુલ ૪૧૫ લાખ, શિક્ષણ ક્ષેત્રે ૨૦૮.૫૦ લાખ, આરોગ્ય ક્ષેત્ર માટે ૬ લાખ, ખેતીવાડી માટે ૭ લાખ, પશુપાલન માટે સેક્સડ સિમેન ડોઝથી વિનામૂલ્યે કૃત્રિમ બીજદાન માટે તેમજ પૂર, અતિવૃષ્ટિ, વાવાઝોડા સમયે મૃત્યુ પામતા પશુઓના મૃતદેહના નિકાલ માટે દવાની ખરીદી માટે મળી ₹૬.૨૦ લાખની જોગવાઈ કરાઈ છે.

આ ઉપરાંત રૂપિયા ૩૦ લાખ સામાજિક ન્યાય નિધિ પેટે અને કોમ્યુનિટી હોલના કામો સહિત સમાજ કલ્યાણ માટે રૂપિયા ૫૦ લાખ જ્યારે સિંચાઈ વિભાગમાં રેતી કંકરના અગાઉના વર્ષના વિકાસના કામો માટે રૂપિયા ૫૦ લાખની જોગવાઈ કરાઈ છે. આ ઉપરાંત બાંધકામ સદર હેઠળ કુલ ૯૬.૦૫ લાખ અને મહેસુલ અંતર્ગત નવી ગાડી ખરીદી માટે રૂપિયા ૧૫ લાખ મળી સ્વભંડોળ માંથી કુલ રૂપિયા૮૫૩.૭૫ લાખ ની જોગવાઈ કરાઈ છે. સરકારની વિવિધ પ્રવૃત્તિઓ માટેની ગ્રાન્ટ અંતર્ગત શિક્ષણ માટે કુલ
રૂપિયા ૧૨૧૫.૯૩ લાખ, સમાજ કલ્યાણ ક્ષેત્રે કુલ રૂપિયા ૬૫૮ લાખ,પોષણ માટે રૂપિયા ૧૨૨૮.૭૫ લાખ, પશુ પાલન ક્ષેત્ર માટે ૧૪૫.૯૧ લાખ,ખેતીવાડી વિભાગ માટે ૪૪૧.૨૭ લાખ, સિંચાઈ માટે ૩૨૫ લાખ, બાંધ કામ વિભાગ માટે ૨૦, ૯૫૫ લાખ, આંકડા શાખા માટે ૨૦૦૩ લાખ, અને પંચાયત શાખા માટે ૬૪૩ લાખ મળી સરકારી ક્ષેત્રે રૂપિયા ૨૭,૬૧૫.૮૬ લાખની જોગવાઈ કરવામાં આવી છે. જિલ્લા પંચાયતના બજેટમાં સ્વ ભંડોળની આવકમાંથી કરાયેલ જોગવાઈ મુજબ જિલ્લાની જુદી જુદી ગ્રામ પંચાયતોમાં ૪૧૦ લાખના ખર્ચે સીસી રોડ, પેવર બ્લોક, સીસીટીવી કેમેરા,પીવાના પાણી માટે આરો, એલઇડી લાઇટો અને કોમ્યુ નિટી હોલ જેવા વિકાસના કામો થશે.

આ ઉપરાંત જિલ્લાની શાળાઓમાં રૂપિયા બે કરોડના ખર્ચે શહેરી વિસ્તારમાં પ્રાથમિક શાળાના ઓરડા અને માળખાકીય સુવિધાઓ તેમજ પ્રાથમિક શાળાના બાળકોના વાંચન માટે રૂપિયા ૮ લાખની જોગ વાઈ કરાઈ છે. અંદાજપત્ર સામાન્ય સભામાં રજૂ થયું ત્યારે શાસક પક્ષ ભાજપના ઉપસ્થિત તમામ સભ્યો એ બજેટમાં કોઈપણ પ્રકારની ચર્ચા કર્યા વિના પાટલીઓ થપ થપાવીને બજેટને મંજૂર કર્યું હતું. પરંતુ જિલ્લા પંચાયતના વિરોધ પક્ષના પૂર્વ નેતા અશ્વિન પટેલે જિલ્લા પંચાયતનું સ્વભંડોળ વધે અને સ્વભં ડોળ મજબૂત થાય તે માટે ખાસ ચિંતન બેઠક યોજાઈ અને આ માટે ચર્ચા વિચારણા અને આયોજન કરવા અનુરોધ કર્યો હતો

તે ઉપરાંત બનાસકાંઠ જિલ્લામાંથી રેતી કંકરની આવક બનાસકાંઠા જિલ્લો લઈ જાય છે પરંતુ રોડરસ્તા પાટણના વપરાય છે અને રોડને નુકસાન થાય છે ત્યારે બનાસકાંઠાજિલ્લા માંથી આવકનો થોડો ભાગ માગવામાં આવે રોયલ્ટી નોવધુ હિસ્સો મળે સિંચાઈની શેષ મળતી થાય અને તાલુકા પંચાયતોના બંધ થયેલા પાતાળ કુવાઓની ડિપોઝિટ વીજ તંત્ર પાસેથી પાછી લાવવા પ્રક્રિયા કરવામાં આવે તેમજ સોલાર પ્લાન્ટનો ઉપયોગ થાય વૃક્ષારોપણ વધે અને એકંદરે બજેટમાં સ્વભંડોની આવક વધે તેવા પગલાં ભરવા તેમણે સામાન્યસભામાં પોતાનું સૂચન વ્યક્ત કર્યું હતું.

અહેવાલ યશપાલ સ્વામી