RTE-એક્ટ હેઠળ ગરીબ બાળકો ફ્રી પ્રવેશ મેળવી શકે તે માટે મુખ્યમંત્રી અને શિક્ષણમંત્રી ને પત્ર દ્વારા રજુઆત કતૉ પાટણ ધારાસભ્ય….

પાટણ તા. ૧૧
પાટણ ધારાસભ્ય ડો. કિરીટ પટેલે રાજયના મુખ્યમંત્રી અને શિક્ષણ મંત્રી ને પત્ર લખી રજુઆત કરી છે કે ગુજરાત રાજ્યની ખાનગી શાળાઓમાં RTE-એક્ટ હેઠળ મફત શિક્ષણની પ્રવેશ પ્રક્રિયા આગામી તા.૧૪ માચૅ ના રોજ થી શરૂ થનાર છે. દર વર્ષે આ પ્રવેશ આગલા શૈક્ષણિક વર્ષની ધોરણ-૧ ની સંખ્યાના આધારે ૨૫% લેખે પ્રવેશ માટે વિદ્યાર્થી સંખ્યા નક્કી કરવામાં આવે છે. અને તે અનુસાર દરેક શાળાઓમાં સંખ્યાની ફાળવણી કરવામાં આવે છે.

ગુજરાત સરકારે ગત શૈક્ષણિક વર્ષમાં ધોરણ-૧ માં પ્રવેશ માટેની વય મર્યાદામાં વધારો કરી ૫-વર્ષના બદલે ૬-વર્ષ કરવામાં આવેલ હતી. જેના કારણે ૨૦૨૩-૨૪ ના શેક્ષણિક વર્ષમાં ૬-વર્ષની મર્યાદાવાળા બાળકો પ્રવેશને પાત્ર થતાં હતા. પરંતુ આ બાળકોએ ૫-વર્ષની વય મર્યાદા પુર્ણ થતાં શેક્ષણિક વર્ષ ૨૦૨૨- ૨૩ માં પ્રવેશ મેળવી લીધેલ હતો. તેથી ૬-વર્ષ ની મર્યાદાવાળા બાળકો કે જેઓએ કોઈ પણ કારણસર પ્રવેશ ન મેળવ્યો હોય એવા રડ્યા ખડયા બાળકોએ ૨૦૨૩ -૨૪ ના વર્ષમાં ધોરણ-૧ માં પ્રવેશ મેળવેલ. આમ શેક્ષણિક વર્ષ ૨૦૨૩-૨૪ માં ધોરણ-૧ ની પ્રવેશની સંખ્યા નહિવત બનેલ છે.

આથી શેક્ષણિક વર્ષ ૨૦૨૪-૨૫ ના વર્ષમાં ગત વર્ષની ધોરણ-૧ ની સંખ્યાના આધારે પ્રવેશ પ્રક્રિયા હાથ ધરવામાં આવે તો આ શૈક્ષણિક વર્ષમાં ગુજરાત રાજ્યની ખાનગી શાળાઓમાં RTE-એક્ટ હેઠળ મફત શિક્ષણમાં નહિવત સંખ્યામાં ગરીબ વિધ્યાર્થીઓ પ્રવેશ મેળવશે. જેથી ગુજરાત સરકારે જાહેર કરેલા માપદંડોમાં આવતા ગરીબ વિધ્યાર્થીઓ પ્રવેશથી વંચિત રહી જશે.ત્યારે શેક્ષણિક વર્ષ : ૨૦૨૪-૨૫ પૂરતા પ્રવેશની સંખ્યા ૨૦૨૨-૨૩ ની સંખ્યાના આધારે પ્રવેશ આપવામાં આવે તેવો ગરીબ બાળકોના હિતમાં નિર્ણય કરી ગરીબ બાળકોને RTE-એક્ટ હેઠળ પ્રવેશ મળે તેવી વિનંતી સાથે પાટણ ધારાસભ્ય ડો. કિરીટ પટેલે પત્ર લખી રજુઆત કરી હોવાનું જાણવા મળ્યું છે.

અહેવાલ યશપાલ સ્વામી