પાટણના ડો.કમલ ગુપ્તાપરિવારે દેહદાતા પિતાની યાદમાં વિશ્વ પયૉવરણ દિને પ્રાકૃતિક શ્રધ્ધાંજલિ પાઠવી..

દેશીકૂળ ના 12 વૃક્ષ વાવી પક્ષીઓ માટે 12 મણ ચણ અપૅણ કરી..

પાટણ તા. ૬
પાટણ સદભાવ હોસ્પિટલ ના આઈસીયુ વિભાગના ડો.કમલ ગુપ્તા પરિવારે વિશ્વ પર્યાવરણ દિવસે દેહદાતા પિતા સ્વ. ઉમેશચંદ્ર ગુપ્તાની યાદમાં સહસ્ત્ર તરૂવન ખાતે જુદા જુદા પ્રકારના 12 વૃક્ષો વાવી તેના ઉછેર માંટે સંકલ્પ ગ્રહણ કરી 12 મણ પક્ષીઓને ચણ નાખી પોતાના સ્વગૅસ્થ પિતાને પ્રાકૃતિક શ્રદ્ધાંજલિ અર્પિત કરી સમાજને પર્યાવરણ જાળવણી માટે નવી રાહ ચીંધી હતી.

વિશ્વ પર્યાવરણ દિવસ નિમિત્તે ડો. કમલ ગુપ્તા અને તેમના નાના ભાઇ ભરતભાઇ ગુપ્તા અને સમસ્ત પરિવાર અને મિત્રોએ સરસ્વતી નદીના કિનારે સહસ્ત્ર તરુવનમાં સરસ્વતી પીપળવન ખાતે 12 દેશીકુળ ના વૃક્ષો વાવી દત્તક લઈ આર્યાવ્રત નિર્માણ સંસ્થામાં રૂ. 25200 રૂપિયા વૃક્ષ ઉછેર માટે નિભાવ ખર્ચ તથા 12 મણ પક્ષીઓને ચણ માટે આપી પ્રાકૃતિક શ્રદ્ધાંજલિ અર્પિત કરી હતી જે ગ્લોબલ વોર્મિંગ અને કલાયમેટ ચેંજના વૈશ્વિક પડકારને પહોંચી વળવા સમાજ માટે પ્રેરણાદાયી અને અનુકરણીય બન્યું છે.

આ હરિત શ્રદ્ધાંજલિ અર્પિત કરવા ડો. કમલ ગુપ્તાના પરિવારની સાથે સદભાવ હોસ્પિટલ ના ડો.મયંક પટેલ,ડો.રાજેશ ઓઝા,ડો.અશ્વિન પટેલ, ડો.મંસૂર અલી, ડો.સચિન પટેલ પણ જોડાયા હતા અને સૌએ પર્યાવરણ જાળવણી માટે ગ્રીન કમાન્ડોના સંકલ્પ લઈ, વૃક્ષારોપણ કરી, બે મિનિટ મૌન પાળી પ્રાકૃતિક શ્રદ્ધાંજલિનું બધું જ પુણ્ય સ્વ.ઉમેશચંદ્ર ગુપ્તાને અર્પણ કર્યું હતુ.

આર્યાવ્રત નિર્માણના પ્રમુખ નિલેશ રાજગોર દ્વારા ગુપ્તા પરિવારની આ પ્રાકૃતિક શ્રધ્ધાંજલિની સરાહના કરી સમાજને આહવાન કરવામાં આવ્યું હતું કે ગ્લોબલ વોર્મિંગના વૈશ્વિક પડકાર સામે પહોંચી વળવા વિવિધ પ્રસંગોએ વધુમાં વધુ દેશીકુળના વૃક્ષો વાવીને ઉછેરવા જોઈએ તથા જે હયાત પ્રાકૃતિક સંપદા છે તેની જાળવણી કરવી જોઈએ જેથી માનવ સમાજ સહીત સમસ્ત જીવસૃષ્ટિનું કલ્યાણ થાય.

અહેવાલ યશપાલ સ્વામી