પાટણ યુનિવર્સિટી દ્વારા ચાલું મહિનામાં વિવિધ સતા મંડળોની રચના કરાઈ તેવી શકયતાઓ પ્રબળ બની…

યુનિવર્સિટી દ્વારા મોડલ સ્ટેચ્યુટ માં 40 જેટલા સુધારા સરકાર માં મોકલવામાં આવ્યા..

પાટણ તા. ૭
પાટણ હેમચંદ્રાચાર્ય ઉત્તર ગુજરાત યુનિવર્સિટી સંલગ્ન વિવિધ કોલેજોમાં ચાલુ વર્ષે જીકાસ પોર્ટલ મારફતે યુજી અને પીજી ના વિવિધ અભ્યાસ ક્રમોમાં ઓનલાઇન પ્રવેશની હાથ ધરાયેલ કામગીરી દરમ્યાન સ્નાતક કક્ષાના પ્રવેશ અંગેની સમય મર્યાદા પૂરી થયેલ છે. જેમાં તારીખ લંબાવાતા અનેક વિદ્યાર્થીઓ પ્રવેશનો લાભ લઈ શક્યા હતા. અનુસ્નાતક (પીજી) માં પ્રવેશ અંગેની કાર્યવાહી જીકાસ મારફતે તા.13 મી જૂન સુધી ચાલનાર છે.

ત્યારે આધારભૂત સૂત્રો દ્વારા જાણવા મળતી માહિતી મુજબ પાટણ યુનિવર્સિટીની કારોબારી સમિતિ (ઈસી) ની બેઠક આગામી 13 જુનના રોજ તેમજ બોર્ડ ઓફ મેનેજમેન્ટ (બીઓએમ) ની બેઠક તા.19 જૂનના રોજ મળનાર છે જેમાં જીકાસ પોર્ટલ અંતર્ગત પ્રવેશ અંગેની કાર્યવાહી ઉપરાંત અન્ય કોલેજોને મંજૂરી તેમજ પ્રવેશને લગતા મહત્વના મુદ્દાઓ અંગે ચર્ચા વિચારણા અને નિર્ણયો લેવાશે.

જોકે,તાજેતરમાં યોજાયેલ લોકસભાની ચૂંટણીની આચાર સંહિતાને અનુલક્ષીને યુનિવર્સિટીના કેટલાક સત્તામંડળની રચનાના નિર્ણયો હાથ પર લેવાઈ શક્યા ન હતા.જે હવે આગામી સમયમાં યુનિવર્સિટીના નવા એક્ટ મુજબ સત્તામંડળની રચના અને વિવિધ બોડીની રચના અંગેની કાર્યવાહી હાથ ધરાશે.

ઉત્તર ગુજરાત યુનિવર્સિટી દ્વારા મોડેલ સ્ટેચ્યુટમાં સુધારા બાબતે 40 જેટલા સુધારા સરકારમાં મોકલવામાં આવેલ છે તે પૈકી કેટલાની મંજૂરી મળશે તે જોવાનું રહે છે, પરંતુ મોડેલ સ્ટેચ્યુટમાં સુધારા થાય તેવી શક્યતાઓ જાણવા મળી રહી છે અને આગામી 7 થી 10 દિવસમાં સરકાર દ્વારા સ્ટેચ્યુટ અને ઓર્ડિનન્સ પ્રસિદ્ધ કરી દેવામાં આવે તેવી પણ શક્યતા હોવાનું સૂત્રો દ્વારા જાણવા મળે છે.

જેથી ચાલુ મહિના દરમિયાન યુનિવર્સિટી દ્વારા ઈસી અને બોર્ડ ઓફ મેનેજમેન્ટ ઉપરાંત અન્ય બોર્ડ ઓફ સ્ટડી, ડીન, રિસર્ચ બોડી સહિત સત્તા મંડળોની રચના નવા એકટ મુજબ કરવા યુનિવર્સિટી દ્વારા ચક્રો ગતિમાન થશે તેવું સુત્રો તરફથી જાણવા મળ્યું હતું.

અહેવાલ યશપાલ સ્વામી