પાટણ તા. ૨૭
લોકસભા સામાન્ય ચૂંટણી-2024 માટે રાજ્યમાં મતદાનને આડે હવે ગણતરીના દિવસો જ બાકી રહ્યા છે. ત્યારે પાટણ જિલ્લામાં આગામી તા.07 મેના રોજ મતદાન થવાનું છે તેને ધ્યાનમાં રાખીને જિલ્લામાં મહત્તમ મતદાન થાય તે જરૂરી છે. મતદાન એ આપણી પ્રવિત્ર ફરજ છે. યુવા,દિવ્યાંગો, મહિલાઓ, વૃદ્ધો વગેરે તમામ લોકો મતદાન કરીને આ મહાપર્વમાં સહભાગી બને તે જરૂરી છે. ખાસ કરીને જેઓ પ્રથમ વાર મત આપવા જઈ રહ્યા છે એટલે કે 18-19 વર્ષના મતદારો માટે મતદાન કરવું ખુબ અગત્યનું છે.
યુવાનો દેશનું ભવિષ્ય છે તેવું કહી શકાય. તેથી આજના યુવાનનો એક એક મત ખુબ જરૂરી છે. 18-19 વર્ષના યુવાનોમાં મત આપવા માટે એક અનેરો જ ઉત્સાહ હોય છે. કારણ કે તેઓ આ પ્રક્રિયાથી પહેલી વાર જોડાતા હોય છે. આ જ યુવાન દેશનું ભવિષ્ય નક્કી કરે છે.
રાજ્યમાં ત્રીજા તબક્કામાં થનાર મતદાન માં અનેક યુવાનો એવા છે જે પ્રથમ વાર મત આપવા જઈ રહ્યા છે. લોકશાહીના મહાપર્વમાં ગામડા- શહેરો, નગરો અને સરકારી કચેરીઓ તેમજ ખાનગી દુકાનો, મોલ, હોટલો, કંપનીઓ તમામ સ્થળે મત દાન જાગૃતિની પ્રવૃતિઓ પૂરજોશમાં ચાલી રહી છે.
તા. 7 મે ના રોજ મતદાનના દિવસે આ મહાપર્વને વધાવવા માટે સૌ મતદારો આતુર બન્યા છે ત્યારે પાટણ જિલ્લાની ચાર વિધાનસભા બેઠક પર કુલ 40051 યુવા મતદારો પ્રથમ વાર પોતાનો મત આપવાના છે. પાટણ જિલ્લામાં પ્રથમ વાર મતદાન કરનાર યુવાનોમાં 16-રાધનપુરમાં કુલ 10733 યુવાનો, 17-ચાણ સ્મા માં કુલ 9884, 18-પાટણમાં 10064 અને 19-સિદ્ધપુરમાં કુલ 9370 18-19 વર્ષના યુવાનો પોતાનો કિમતી મત આપીને લોકશાહીના આ મહાપર્વમાં સહભાગી બનનાર હોવાનું સુત્રો તરફથી જાણવા મળ્યું છે.
અહેવાલ યશપાલ શ્યામી
