હર ઘર તિરંગા અભિયાન અંતર્ગત 13 ઓગસ્ટના રોજ પાટણમાં યોજાશે ભવ્ય તિરંગા યાત્રા….

પાટણ તા. ૭
દેશમાં સ્વતંત્રતા પર્વને લઈને દેશભરમાં ઉત્સાહનો માહોલ છે. જેના ભાગરૂપે હર ઘર તિરંગા અભિયાન અને તિરંગા યાત્રાનું આયોજન કરવામાં આવ્યું છે. જે અંતર્ગત પાટણ જિલ્લામાં તા.12 ઓગસ્ટ ના ચાર વાગે તિરંગા યાત્રાનું જિલ્લા વહીવટી તંત્ર દ્વારા આયોજન કરવામાં આવ્યું છે.

જેમાં પાટણના નાગરિકો તેમજ સ્વૈચ્છિક સંસ્થાઓ જોડાશે. દેશમાં હર ઘર તિરંગા કાર્યક્રમનું દેશભરમાં આયોજન કરવામાં આવ્યું છે. ઐતિહાસિક ધરોહર ધરાવતા પાટણ જિલ્લો પણ તેમાં અગ્રેસર બને તે માટે જિલ્લા કલેકટર અરવિંદ વિજયનના અઘ્યક્ષ સ્થાને હર ઘર તિરંગા અભિયાન અને તિરંગા યાત્રા ના આયોજન જીલ્લા સેવા સદન ખાતે કરવામાં આવ્યું.

આ બેઠકને સંબોધતા જિલ્લા કલેકટર અરવિંદ વિજયને જણાવ્યું હતું કે, પાટણ જિલ્લાના આઇકોનિક સ્થળ સિદ્ધપુર બિંદુ સરોવર અને પાટણની રાણીની વાવ ખાતે તિરંગા કાર્યક્રમનું આયોજન થશે.

સરહદી વિસ્તારના ગામડાઓમાં પણ હર ઘર તિરંગા અભિયાનને લઈને કાર્યક્રમ યોજાશે. શાળા ઓમાં તિરંગા યાત્રા અંતર્ગત સ્પર્ધાઓ યોજાશે આ તિરંગા યાત્રામાં પાટણના નાગરિક સહભાગી બનશે તેવો વિશ્વાસ વ્યક્ત કર્યો હતો.

પાટણ શહેરમાં નીકળનારી તિરંગા યાત્રાનું પ્રસ્થાન એમ એન હાઇસ્કુલ થશે. તિરંગા યાત્રામાં સહ ભાગી બનનાર દરેક નાગરિક એમ એન હાઇસ્કુલ થી યાત્રામાં જોડાશે. ત્યાર બાદ તિરંગા યાત્રા રંગીલા હનુમાન, ત્રણ દરવાજા, હિંગળા ચાચર સર્કલ થઈ બગવાડા દરવાજા પોહચશે. બગવાડા દરવાજા થી રેલવે સ્ટેશન વચ્ચે તિરંગા યાત્રાનો અંતિમ પડાવ હશે.

જ્યારે રેલવે સ્ટેશન પર જ્યાં આપણો રાષ્ટ્ર ધ્વજ લહેરાઈ રહ્યો છે. ત્યાં તિરંગા યાત્રાનું સમાપન થશે. આ તિરંગા યાત્રામાં દરેક નાગરિક પોતાના હાથમાં તિરંગો લઈ જોડાશે. જ્યારે ડીજેના તાલે દેશ ભક્તિ ના ગીતો તિરંગા યાત્રામાં સહભાગી થનારા નાગરિકોમાં રાષ્ટ્ર ભાવનાને વધુ જાગૃત કરશે. આ બેઠકમાં પોલીસ અધિક્ષક ડૉ. રવીન્દ્ર પટેલ, નિવાસી અધિક કલેક્ટર બી.એસ.પટેલ તેમજ જિલ્લાના ઉચ્ચ અધિકારીઓ ઉપસ્થિત રહ્યા હતા.

અહેવાલ યશપાલ સ્વામી