પાટણ શહેરના મહોલ્લા, પોળો અને સોસાયટી વિસ્તાર સહિત ગણપતિ મંદિર ખાતે ગણેશ ઉત્સવ નો પ્રારંભ કરાયો..

અબીલ ગુલાલની છોળો વચ્ચે શ્રી ને વાજતે ગાજતે પંડાલમાં સ્થાપિત કરાયા..

પાટણ તા. ૭
પાટણ શહેરમાં ગણેશ મહોત્સવની ઠેર-ઠેર ઉજવણી કરવામાં આવી રહી છે. શહેરમાં શુકવારે રાત્રે અને શનિવારે વહેલી સવારથી ભક્તો એ પોતાના ઘરોમાં શ્રીજીની મૂર્તિની સ્થાપના કરી હતી. માટીની મૂર્તિની સ્થાપના કરવા માટે સવારથી જ ઓતિયા પરિવાર સહિત અન્ય દૂકાનો, લારીઓ પર શ્રદ્ધાળુઓનો ભારે ઘસારો જોવા મળ્યો હતો.અબીલ ગુલાલની છોળો ઉડાડી શ્રીજીની પૂજા અર્ચના કરી મૂર્તિઓને પોતાના ઘરે સોસાયટીઓ, મહોલ્લા, પોળોમાં લઇ જવા માટે રીક્ષા, લારીઓ, ઊંટ લારીઓ અને ટ્રેક્ટરો, ગાડી, બાઇક પર વાજતે-ગાજતે લઈ જઈ શ્રીજીની પૂજા અર્ચના કરી સ્થાપના કરવામાં આવી હતી.

તેમજ શહેરના વિવિધ ગણપતિના મંદિરોમાં હોમ હવન પણ યોજાયા હતો. શહેરમાં આજે ગણેશ ચતુર્થીના પાવન દિવસે શહેરના હિંગળાચાચર ચોકમાં ગણપતિની પોળમાં આવેલા અતિપ્રાચીન સિદ્ધિ વિનાયક ગણપતિ મંદિરમાં દર વર્ષેની જેમ આ વર્ષે પણ હજારો ની સંખ્યામાં શ્રદ્ધાળુઓ ગણેશજી ના દર્શન કરી આશિર્વાદ મેળવ્યા હતા. તો શહેરના ભદ્ર વિસ્તારમાં આવેલ ગણેશ વાડી સહિત મામલતદાર કચેરી ખાતે ના ગણેશ મંદિર ખાતે ગણપતિ દાદાનો હવન યોજાયો હતો.જેમાં નાયબ મામલતદાર યજમાન સચિન પંચાલ પરિવારે લીધો હતો.આ પ્રસંગે મામલતદાર કચેરીના સ્ટાફ સહીત પ્રાન્ત અધિકારી મિતુલ પટેલ ઉપસ્થિત રહ્યા હતા .

શહેરમાં ખાપગરાની પોળમાં સિદ્ધિ વિનાયક મંદિર અને ગણપતિની પોળમાં આવેલ ગણપતિ મંદિર ખાતે આરતી ઉત્સવમાં દર્શનાર્થીઓ ઉમટયા હતા. ગણપતિની પોળ આગળ ગણેશ ચતુર્થીએ મેળો જામ્યો હતો. પાટણના રાજમહેલ રોડ પર પાલિકા બજારના રાજા ગણપતિ દાદાની મૂર્તિનું પાલિકા બજારમાં સ્થાપન કરાયુ હતુ. જયારે કલાનગર સોસાયટીના રહીશો દ્વારાગણેશ ચતુર્થીના પાવન પ્રસંગે વાજતે ગાજતે ધામધૂમ થી સોસાયટીમાં ગણપતિની મૂર્તિની પધરામણી કરવામાં આવી હતી . શહેરમાં વીજળીકૂવો, સોનીવાડો, ઝીણીરેત, નાનીસરાય, સાલવીવાડો, ગુર્જરવાડો, ઝીણી પોળ, નાગરલીમડી, ઉંચીશેરી , ઝવેરી વાડો ,કનાથ વાડો સહીત મહોલ્લા , સોસાયટીમાં સંયુકત રીતે ગણેશોત્સવ ઉજવવા ચાચર ચોકમાં શ્રી નું સ્થાપન કરવામાં આવ્યું હતું.

અહેવાલ યશપાલ સ્વામી