પાટણમાં ‘માં નો પરિવાર’ દ્વારા મોટીવેશન સ્પિકર નેહલ ગઢવી નો કાર્યક્રમ યોજાયો..

ફોનની ડી.પી.માં કે કારની બોનેટ પર રાષ્ટ્રધ્વજ રાખવાથી રાષ્ટ્રભક્તિ દર્શાવી શકાતી નથી : નેહલ ગઢવી…

પાટણ તા. ૧૦
‘માં નો પરિવાર’ દ્વારા મોટીવેશન સ્પિકર નેહલ ગઢવી નો એપીએમસી હોલ ખાતે રવિવારે રાત્રે પાટણના પ્રબુદ્ધ નગરજનોને મોટીવેશન કરતો કાર્યક્રમ આયોજિત કરવામાં આવ્યો હતો. પોતાની આગવી વાકધારાથી ઉપસ્થિત સૌને મોટીવેશન કરતાં નેહલ ગઢવીએ સમાજ, સંસ્કૃતિ અને સમાજ ભાવના સાથે દેશ દાઝ માટે જણાવ્યું હતું કે દરેકના દિલમાં દિવડા માનવતાનાં પ્રગટે તે જરૂરી છે. આજે બે વ્યક્તિઓ વચ્ચે ‘ઓળખ’ ની હરિફાઈ અતિ તિવ્ર બની ગઈ છે. આજે મોબાઈલ યુગમાં પરિવારો વચ્ચે ‘મારો’ ‘આપણો’ નામની વ્યાખ્યા સમૂળગી કપાઈ ગઈ છે.’વિચારોનાં દિવા અખંટ પ્રગટેલા રાખવા અધરા છે. ગીતાના એકે એકે શ્લોક વાચવા માટે નહિં પણ તેને જીવી જવા માટે છે.

જગતમાં કાં ન કરવું એ સૌથી અધરું કામ છે. ફોનની ડી.પી.માં કે કારની બોનેટ પર રાષ્ટ્રધ્વજ રાખવાથી રાષ્ટ્રભક્તિ દર્શાવી શકાતી નથી. જો તમે બાજુવાળા પડોશીની ચાલુ કે બંધ લાઈટ પણ સહન ન કરી શકતા હોવ તો અખંડ ભારતની વાતો પણ કોઈએ ન કરવી જોઈએ’ તેઓએ માનવ જીવનની અનેક સમસ્યાઓ, રૂઢીઓ, મોબાઇલ યુગનાં લાભાલાભ, વધતી કે ઘટતી માનવીય સંવેદનાઓને પોતાની કાઠીયાવાડી ભાષામાં વણૅવી જણાવેલ કે કેટલાક વિદ્યાનોમાં કહ્યું કે, માણસની કિંમત તેની ક્ષમતાનાં આધારે નક્કી થાય છે, આપણે સામૂહિક રીતે સુતેલામાણસો છીએ,

આજે મોબાઇલ યુગમાં પહેલાની જેમ ટી.વી.નાં રિમોટ માટે એટલા માટે ઝઘડતા નથી કે હવે બધુજ ઓનલાઈન થઇ ગયુ જેના કારણે આજે પરિવારો વચ્ચે ‘મારો’ કે ‘આપણો’ નામની વ્યાખ્યા સમૂળગી કપાઇ ગઇ છે. આજે માણસોમાં સહન શક્તિ ઓછી થઇ નથી પણ સમજશક્તિ ઓછી થવાથી જિંદગી ‘હુ… તુ… તુ…’ રમતી થઈ ગઇ છે. તેમણે કહ્યું કે, હિમાલયને ઓગાળવો કદાચ સહેલો હશે. પણ માણસનાં અહંકારને ઓગાળવો ખુબ જ અઘરો છે.

જે લોકોને તમારી ગેર હાજરીથી કોઈ ફરક પડતો નથી તો યાદ રાખો કે તમારી હાજરીથી પણ કોઇ ફરક પડતો નથી તેમ જણાવી પરિવારને પરિવાર ની ભાવનાથી જોડી રાખવા માટે તેઓએ સુંદર દ્રષ્ટાંત સાથે ઉપસ્થિત સૌને મોટીવેશન કરી પ્રશ્નોતરી સાથે પાટણના પ્રબુદ્ધ નગરજનો ના પ્રશ્નો ના સરળ જવાબ આપ્યા હતા. આ પ્રસંગે પાટણનાં વિદ્વાન અને સાહિત્યકાર અને કાળકા મંદિરનાં પૂજારી અશોકભાઇ વ્યાસે વક્તાનો સંક્ષિપ્તમાં પરિચય આપ્યો હતો. આભા રવિધી પાટણ એપીએમસી ચેરમેન સ્નેહલભાઈ પટેલે કરી હતી.

આ પ્રસંગે સંસ્થાના પ્રમુખ કે.સી. પટેલ, બેબા શેઠ, દર્શક ત્રિવેદી, યતીન ગાધી, હેમત તન્ના, કમલેશ સ્વામી, જીતુભાઈ પટેલ સહિત મા ના પરિવારના સભ્યો મોટી સંખ્યામાં ઉપસ્થિત રહ્યા હતા. નેહલ ગઢવીના મોટીવેશન કાર્યક્રમ પૂર્વે માના પરિવારના કે.સી.પટેલ, પાટણ એપીએમસી ચેરમેન સ્નેહલભાઈ પટેલ દ્વારા રાજ્યકક્ષાએ પાટણને ગૌરવ અપાવનારા ગૌરવવંતા પાટણ ના ત્રણ શિક્ષકો નું મા ના પરિવાર દ્વારા સાલ અને બુકેથી સન્માન કરી શુભેચ્છાઓ પાઠવવામાં આવી હતી.

અહેવાલ યશપાલ સ્વામી