પાટણ જિલ્લામાં ૧૭ સપ્ટેમ્બર થી ૧૦ મા તબકકા નો ‘સેવા સેતુ’ કાર્યક્રમ યોજાશે..

જિલ્લાવાસીઓને સેવાસેતુ કાર્યક્રમનો લાભ લેવા અનુરોધ…

કાર્યક્રમમાં સરકારના ૧૩ જેટલા વિભાગોની ૫૫ જેટલી સેવાઓ મળી રહેશે…

પાટણ તા. ૧૩
રાજ્ય સરકારની પ્રજાલક્ષી યોજનાઓનો લાભ પ્રજાને સતત મળતો રહે જેથી વહીવટમાં કાર્યક્ષમતા, પારદર્શકતા,સંવેદન શીલતા તથા જવાબદારી પણુંની બાબતને રાજ્ય સરકાર દ્વારા હાર્દ સમાન ગણવામાં આવેલ છે. જેને ધ્યાનમાં લઈને રાજ્યના પ્રજાજનોને વ્યક્તિગત સેવાઓ તેમના રહેઠાણના નજીકના સ્થળે, તે જ દિવસે પ્રાપ્ત થઈ શકે તેવા ઉમદા હેતુ સાથે સેવાસેતુ કાર્યક્રમના દસમા તબક્કાનો શુભારંભ તા. ૧૭ સપ્ટેમ્બર થી કરવામાં આવી રહ્યો છે. પાટણ જિલ્લામાં પણ આગામી તા.૧૭ સપ્ટેમ્બરથી સેવા સેતુ કાર્યક્રમની શરૂઆત કરવામાં આવી રહી છે. જિલ્લાના ગ્રામ્ય અને શહેરી વિસ્તારોમાં વિવિધ દિવસો એ આ કાર્યક્રમનું આયોજન કરવામાં આવી રહ્યું છે.

જે અન્વયે આગામી તા.૧૭ ના રોજ રાધનપુર, સાંતલપુર,પાટણ (ગ્રામ્ય), હારીજ, સમી, ચાણસ્મા, શંખેશ્વર,સિદ્ધપુર, સરસ્વતી તાલુકાની શાળાઓમાં સેવા સેતુ કાર્યક્રમ યોજાનાર છે. જેમાં વિવિધ ગામોને આવરી લેવામાં આવ્યા છે. તા.૧૭ સપ્ટેમ્બરથી શરૂ થનાર આ કાર્યક્રમ તા.૨૫ સપ્ટેમ્બર સુધી ચાલશે. તા.૧૭ ના રોજ રાધનપુર ની કમાલપુર પ્રાથમિક શાળા,સાંતલપુરની સાંતલપુર પ્રાથમિક શાળા નં-૧, હારીજની પ્રા.શાળા રાવિન્દ્રા, સમી તાલુકાની કન્યા પ્રાથમિક શાળા દુદખા, શંખેશ્વર ની પ્રા. કુમાર શાળા, સિદ્ધપુર તાલુકાની બિલિયા પગાર કેન્દ્ર શાળા, સરસ્વતી તાલુકા ની પ્રા.શાળા વાયડ,પાટણ (ગ્રામ્ય) તાલુકાની સી. જે. પંચાલ હાઈસ્કુલ-સંડેર,ચાણસ્મા તાલુકાની પ્રા.શાળા કેશણી મુકામે સેવા સેતુ કાર્યક્રમ યોજાશે જેમાં વિવિધ ગામોને આવરી લેવામાં આવ્યા છે.

પ્રજાજનોને વ્યક્તિગત સેવાઓ તેમના રહેઠાણના નજીકના સ્થળે, તે જ દિવસે પ્રાપ્ત થઈ શકે તેવા ઉમદા હેતુ સાથે હાથ ધરાનારા આ સેવા સેતુ કાર્યક્રમના દસમાં તબક્કામાં પાટણ કલેકટર અરવિંદ વિજયન અને જિલ્લા વિકાસ અધિકારી બી.એમ. પ્રજાપતિના માર્ગ દર્શન હેઠળ યોજાનાર સેવાસેતુ કાર્યક્રમમાં જિલ્લાના ૯ તાલુકાના તમામ ગામોને આવરી લેવામાં આવશે. આ કાર્યક્રમનો ગ્રામ્યજનોને લાભ લેવા માટે જિલ્લા વહીવટી તંત્ર દ્વારા અનુરોધ કરવામાં આવ્યો છે.

અહેવાલ યશપાલ સ્વામી