પાટણ તા. 27 પાટણ નાં સાલવીવાડા વિસ્તારમાં ભીલવાસ પાસે ઠાકોર વાસનાં મહોલ્લામાં ગણેશોત્સવ દરમ્યાન કેટલાક લોકોની હરકતો શંકાસ્પદ જણાતાં તેમને જતાં રહેવા માટે અત્રેનાં એક વ્યકિતએ કહેતાં તેની અદાવત રાખીને ચાર જણાએ યુવાનને રાત્રે સાડા નવ વાગે પકડીને હુમલો કરી માર માર્યો હોવાની પોલીસ દફતરે ફરિયાદ નોધાવા પામી છે. આ અંગેની મળતી વિગતો એવી છે કે, પાટણનાં સાલીવાવાડા ઠાકોરવાસમાં બે દિવસ પહેલાં ગણપતિ ઉત્સવ હતો ત્યારે ચાર વ્યક્તિઓ અહીંનાં ઉત્સવમાં આવ્યા હતા ને તેઓ આમથી તેમ આંટા મારતાં હતા. જેથી તેમની હરકતો યોગ્ય ન જણાતાં અત્રે રહેતાં વિશાલ રમેશજી ઠાકોર એ આ ચારેય લોકોને અહીંથી જતાં રહેવાનું કહેતાં તેઓ જતાં રહ્યા હતા. પંરતુ ગત તા.૨૪-૯-૨૩નાં રોજ વિશાલ તથા સંજય બંને જણા ડી.જે.નાં પૈસા આપવા માટે જતા હતા ત્યારે પાટણનાં જુની કાળકા મંદિર પાસે પહોંચતાં અહીં બેઠેલા ઉપરોક્ત ચારેય જણાએ વિશાલને જોઇને ગાળો બોલીને ‘તું શું કરવા આ બાજુ આવ્યો છે તેમ કહીને ઉશ્કેરાઇ જઇને તેને આડેધડ માર મારી તેને પકડી રાખીને લોખંડનાં ટુકડાથી આંખ ઉપર મારતાં તથા અન્યએ લાફા મારી ધમકી આપતા આ બનાવ અંગે પોલીસે વિશાલની ફરિયાદનાં આધારે ચાર શખ્સો કાર્તિક ઠાકોર, રવિ ઠાકોર, ભાવેશ ઠાકોર અને અલ્પેશ ઉર્ફે અપ્પુડી પટેલ સામે ગુનો નોંધી વધુ તપાસ પોલીસે હાથ ધરી હોવાનું જાણવા મળ્યું છે.
અહેવાલ યશપાલ સ્વામી
