જિલ્લા પંચાયત પ્રમુખ દ્વારા બાળગૃહના બાળકોને દિવાળી નિમિતે વિવિધ ભેટ આપતા બાળકો હરખાયા…

પાટણ તા. ૯
સામાજિક ન્યાય અને અધિકારીતા વિભાગના સમાજ સુરક્ષા ખાતા હેઠળ જુવેનાઇલ જસ્ટીસ એક્ટ-૨૦૧૫ અંતર્ગત ગુજરાત રાજ્યમાં વિવિધ પ્રકારના બાળગૃહો કાર્યરત છે. જેમાં પાટણ જિલ્લામાં પણ સરકારી ચિલ્ડ્રન હોમ ફોર બોયઝ, જાળેશ્વર પાલડી ખાતે કાળજી, સંભાળ અને રક્ષણની જરૂરિયાતવાળા ૧૯ બાળકો આશ્રય લઇ રહેલા છે. જેઓને જિલ્લા પંચાયત પ્રમુખ હેતલબેન વી. ઠાકોર દ્વારા દિવાળી નિમિતે કપડા, મીઠાઈ તથા રોકડ કવરની ભેટ આપવામાં આવતા બાળકો ના ચહેરા હરખાયા હતા.

પ્રમુખ દ્વારા બાળકોને દિવાળી શુભકામનાઓ અને આવનાર નવું વર્ષ આરોગ્યમય અને લાભદાયક નીવડે તેવા નવા વર્ષના અભિનંદન પાઠવ્યા હતા.કાર્યક્રમમાં જિલ્લા પંચાયતના સભ્યો, વિવિધ સમિતિઓના ચેરમેનો,જિલ્લા વિકાસ અધિકારી ડી. એમ. સોલંકી, પિનલભાઈ પટેલ સભ્ય, બાળ કલ્યાણ સમિતિ પાટણ, જિલ્લા બાળ સુરક્ષા અધિકારી, અધિક્ષક ચિલ્ડ્રન હોમ ફોર બોયઝ પાટણ, સ્ટાફ તથા બાળકો વગેરે ઉપસ્થિત રહ્યા હતા.

અહેવાલ યશપાલ સ્વામી