પાટણમાં શાંતિપૂર્ણ માહોલમાં ધો.12 સાયન્સની પ્રેક્ટિકલ પરીક્ષાનો પ્રારંભ…

શહેરના 4 સેન્ટરના 7 બિલ્ડીંગમાં સીસીટીવી કેમેરા ની નિગરાની હેઠળ પરિક્ષા આપતા પરિક્ષાર્થીઓ..

પાટણ તા. ૧૯
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડની પરીક્ષા આગામી 11 માર્ચથી શરૂ થવાની છે. બોર્ડની પરીક્ષા અગાઉ સોમવાર થી ધોરણ 12 સાયન્સની પ્રેક્ટિકલ પરીક્ષા નો પાટણમાં શાંતિપૂર્ણ માહોલમાં પ્રારંભ થયો છે.રાજ્યમાં 72 હજાર કરતાં વધુ અને પાટણમાં 5 હજાર કરતાં વધુ વિદ્યાર્થીઓ પરીક્ષા આપી રહ્યા છે. સ્કૂલમાં પરીક્ષા આપવા આવનાર વિદ્યાર્થીઓને પરિક્ષા સેન્ટર ખાતે ફૂલ આપી આવકારવામાં આવ્યાં હતાં.

પાટણ જિલ્લામાં સોમવાર થી ધોરણ 12 વિજ્ઞાન પ્રવાહની પ્રેક્ટીકલ પરીક્ષાઓના પ્રારંભે જિલ્લામાં કુલ 5131 વિદ્યાર્થીઓ આ પ્રાયોગિક પરીક્ષા આપી રહ્યા હોવાનું સુત્રોએ જણાવ્યું હતું. ધોરણ 12 વિજ્ઞાન પ્રવાહની પ્રાયોગિક પરીક્ષા માટે જિલ્લાના કુલ ચાર તાલુકાના કેન્દ્રોમાં 7 બિલ્ડીંગમાં પ્રેટીકલ પરીક્ષાનું આયોજન કરવામાં આવ્યું છે.

ધોરણ 12 સાયન્સની આ પ્રાયોગિક પરીક્ષાઓ 29 ફેબ્રુઆરી સુધી ચાલશે. ત્યારે પ્રથમ દિવસે ધો 12 સાયન્સ ના વિદ્યાર્થીઓ શાંતિપૂર્ણ માહોલમાં સીસીટીવી કેમેરા ની નિગરાની હેઠળ પરીક્ષા આપી રહ્યા છે. પાટણ ડીઈઓ કચેરી દ્વારા પ્રાપ્ત થયેલ માહિતી મુજબ પાટણ જિલ્લામાં ધોરણ 12 સાયન્સની પ્રેક્ટીકલ પરીક્ષાઓનો પ્રારંભ થયો છે. આ પ્રાયોગિક પરીક્ષામાં જિલ્લામાં રસાયણ શાસ્ત્રના 1859, ભૌતિક વિજ્ઞાન ના 1859 અને જીવ વિજ્ઞાન ના 1413 વિદ્યાર્થીઓ મળી કુલ 5131 વિદ્યાર્થીઓ પ્રાયોગિક પરીક્ષા આપનાર છે.

આ પ્રાયોગિક પરીક્ષાઓ માટે પાટણ, સિધ્ધપુર, ચાણસ્મા અને રાધનપુર ચાર કેન્દ્રોના કુલ સાત સેન્ટર પર પ્રેક્ટીકલનું આયોજન કરાયું છે. જેમાં પાટણ શહેરમાં એક્સ પરિમેન્ટલ હાઇસ્કૂલ, આદર્શ હાઇસ્કૂલ, બી.એમ. હાઇસ્કૂલ અને બી.ડી. સાર્વજનિક વિદ્યાલયનો સમાવેશ થાય છે. જ્યારે સિધ્ધપુર કેન્દ્રમાં એલ. એસ. હાઇસ્કૂલ, ચાણસ્મા કેન્દ્રમાં પી.પી. પટેલ હાઇસ્કુલ અને રાધનપુર કેન્દ્રમાં આદર્શ હાઇસ્કુલમાં પ્રેકટીકલ પરીક્ષા લેવાઈ રહી છે.

ધોરણ 12 વિજ્ઞાન પ્રવાહની રસાયણ શાસ્ત્ર, ભૌતિક વિજ્ઞાન અને જીવવિજ્ઞાન વિષયની પ્રેક્ટીકલ પરીક્ષા બે સેશનમાં લેવાઇ રહી છે, જેમાં સવારે 10 થી બપોરે 1 અને બપોરે 2 થી સાંજે 5 દરમિયાન પ્રેક્ટીકલ પરીક્ષા યોજાઈ રહી છે. જેમાં એક બેચમાં 20 વિદ્યાર્થીઓ લેબમાં પ્રેક્ટીકલ પરીક્ષા શાંતિપૂર્ણ માહોલ માં આપી રહ્યા હોવાનું સુત્રોએ જણાવ્યું હતું.

અહેવાલ યશપાલ સ્વામી