પાટણ જિલ્લાના 25000 ખેડૂતો રૂ. 48 કરોડની 10 લાખ મણ ઉનાળુ બાજરીનું ઉત્પાદન કરશે..

પાટણ પંથકમાં ઉત્પાદિત થતી ઉનાળુ બાજરીનો મોટો જથ્થો સાઉદી અરેબિયામાં નિકાસ કરવામાં આવે છે…

પાટણ તા. ૯
પાટણ પંથકની આસપાસના વિસ્તારમાં ઉત્પાદિત થતી ઉનાળુ બાજરીનો મોટો જથ્થો કંડલા પોર્ટ મારફતે સાઉદી અરેબિયામાં નિકાસ થાય છે. આ વખતે પાટણ જિલ્લામાં લગભગ 25000 ખેડૂતો રૂ.48 કરોડની 10 લાખ મણ બાજરીના જથ્થાનું ઉત્પાદન કરશે. હાલમાં પાટણ માર્કેટયાર્ડમાં દરરોજ 1500 બોરી બાજરી નો જથ્થો આવી રહ્યો છે. પાટણ જિલ્લામાં 6500 હેક્ટર આસપાસના વિસ્તારમાં ઉનાળું બાજરીનું વાવેતર થાય છે.

જેમાં ખાસ કરીને સરસ્વતી,પાટણ, સિદ્ધપુર અને ચાણસ્મા પંથકમાં બાજરીનું વાવેતર વધારે થાય છે. છેલ્લા 15 દિવસથી પાટણ માર્કેટયાર્ડમાં બાજરીની આવક શરૂ થઈ ગઈ છે. દરરોજ 1500 બોરી આસ પાસ જથ્થો આવી રહ્યો છે. પ્રતિમણે રૂ. 400 થી 460 સુધીના ખેડૂતોને ભાવ મળી રહ્યા છે. જેમાં સરેરાશ પ્રતિમણે રૂ. 440 આસપાસના ભાવ મળે છે. પાટણ ગંજબજારમાંથી બાજરીનો જથ્થો રાજકોટ જાય છે અને ત્યાંથી કંડલા પોર્ટ મારફતે અરબના દેશોમાં નિકાસ થાય છે તેવું માર્કેટયાર્ડના સુત્રો દ્વારા જાણવા મળ્યું હતું.

તો ચાલુ સાલે 10 લાખ મણ બાજરીનું ઉત્પાદન થશે તેવું જિલ્લા ખેતીવાડી અધિકારીએ જણાવતા કહ્યું હતું કે પાટણ જિલ્લામાં લગભગ 25000 ખેડૂતો દ્વારા 6500 હેક્ટર આસપાસ બાજરીનું વાવેતર થયું છે. રૂ.48 કરોડની 10 લાખ મણ ઉનાળુ બાજરીનું ઉત્પાદન થશે. હાલમાં બાજરીની કાપણી ચાલી રહી છે. જેમાં એક વીઘામાંથી 40 થી 50 મણ ઉત્પાદન મળી રહ્યું છે.

આ વખતે ઉત્પાદન અને ભાવ બંને સારા છે. પાટણ જિલ્લામાં 10,000 ખેડૂતો બાજરીની પ્રાકૃતિક ખેતી કરે છે જેમાં પાટણ જિલ્લામાં અજીમાણા, વાઘરોલ, ગલોલીવાસણા, કિંમ્બુવા, જાખાના અને ઠાકરાસણ સહિતના અંદાજે 10,000 જેટલાં ખેડૂતો ઉનાળુ બાજરીની પ્રાકૃતિક ખેતી કરે છે. પ્રાકૃતિક ખેતીથી ખેડૂતોને ખેતી ખર્ચ ઘટી રહ્યો છે. અને ગુણવત્તા યુક્ત બાજરી મળતી હોવાથી બાજરીના ભાવ પણ સારા મળે છે અને જમીન ફળદ્રુપ બને છે તેવું તેમણે  જણાવ્યું હતું.

અહેવાલ યશપાલ સ્વામી