પાટણ તા. ૧૬
ઉનાળાની કાળઝાળ ગરમીમાં રસ્તે જતા આવતા લોકો ને રાહત મળે અને પોષણયુક્ત પ્રવાહી મળી રહે તેવા આશય સાથે પાટણ જિલ્લા બિલ્ડર્સ એસોસિએશન દ્વારા શનિવારે સવારે પાટણ શહેર ના બગવાડા દરવાજા ચોક ખાતે ઠંડી મસાલેદાર છાશનું વિતરણ કરવામાં આવ્યું હતું.
પાટણ જિલ્લા બિલ્ડર એસોસિએશન દ્વારા ઉનાળા ની ગરમીને ધ્યાનમાં લઈને લોકોને મદદરૂપ બનવાની ભાવનાથી આયોજિત આ છાશ વિતરણ ના સેવા કેમ્પમાં અમૂલની શુદ્ધ અને ગુણવત્તા યુક્ત આશરે ૨૦૦ લીટર જેટલી ઠંડી છાશનું લોકોને વિતરણ કરવામાં આવ્યું હતું.
જેનો બજારમાં ખરીદી અર્થે આવનાર ગ્રામીણ અને શહેરી લોકો સહિત રીક્ષાચાલકો, શ્રમિકો, દુકાન દારો, લારી ગલ્લાવાળા તેમજ અન્ય રાહદારીઓએ આ ઠંડી મસાલેદાર છાશની સેવાનો લાભ લઈને ગરમીમાં હાશકારા સાથે રાહતનો ઓડકાર લીધો હતો.
પાટણ જિલ્લા બિલ્ડર એસોસિયેશન ના આ છાસ સેવા કેમ્પમાં પાટણ જિલ્લા બિલ્ડર એસો.ના પ્રમુખ વિપુલ પટેલ સહિત સંજય પટેલ, નીલમ પટેલ, નીતિન પટેલ, હિતેશ ઠક્કર મનોજ પટેલ, ધવલ પટેલ, દિલીપ પટેલ, આરસી પટેલ, ઉત્કર્ષ પટેલ સહિત કાર્યકરોએ ખડે પગે રહી સેવા પૂરી પાડી હતી.
અહેવાલ યશપાલ સ્વામી
