પાટણના ખારીવાવડી સનાતન આશ્રમ ના સંત પ. પૂ. નટવર લાલજી મહારાજ મોક્ષ ધામ પામ્યા…

બ્રાહ્મણ કૂળના મહારાજને અગ્નિદાહ ની જગ્યાએ તેઓની ઈચ્છા અનુસાર સનાતન આશ્રમ ખાતે સમાધિસ્થ કરાયા…

પાટણ તા. ૨૬
પાટણ તાલુકાના માડોત્રી ગામના વતની અને ખારી વાવડી ગામ ખાતે સનાતન આશ્રમ સ્થાપીને ધાર્મિક જાગરણ નું કામ કરતા સનાતન સ્નેહ પ્રેમી સંપ્રદાયના આચાર્ય પૂજ્ય નટવરલાલજી મહારાજ મંગળવારે વહેલી સવારે અનંત યાત્રાએ પ્રસ્થાન કરતા તેઓને તેમની અંતિમ ઈચ્છા અનુસાર સનાતન આશ્રમ ખારી વાવડી ખાતે વિશાળ ભકત સમુદાયની ઉપસ્થિત વચ્ચે સમાધિ આપવામાં આવી હતી.

પાટણ તાલુકાના નાનકડા ગામમાં જન્મેલા પૂજ્ય નટવરલાલ મૂળશંકર મહેતા કે જેઓ નાનપણ થી આધ્યાત્મિક રુચિ ધરાવતા હોવાથી તેઓનું આજીવન જીવન ધર્મની સેવામાં સમર્પિત રહ્યું હતું. તેઓ પુખ્ત વયના થતા સનાતન સ્નેહ પ્રેમી પરિવારમાં દીક્ષા લીધી હતી.અને પૂ.સંતશ્રી નટ વરલાલજી મહારાજ દ્વારા પાટણ સહિત ઉત્તર ગુજરાત, કચ્છ અને કાઠીયાવાડ ખાતે બહોળા શિષ્ય સમુદાયને ધર્મ બોધ આપી ગુરુ પદ સંભાળ્યું હતું.

પાટણ વાડા વિસ્તારમાં પાટ પરંપરામાં તેઓ સંસારી સંત તરીકે ઓળખાયા અને પૂજાયા હતા .તેઓ એક સારા ભાગવત કથાકાર પણ હતા અને વર્ષમાં બે ત્રણ વખત હરદ્વાર ખાતે કથા યોજીને ભક્તોને પવિત્ર ભૂમિ ઉપર કથા શ્રવણ કરાવવાનું કામ કરી રહ્યા હતા. છેલ્લા કેટલાક સમયથી ટૂંકી માંદગી ના કારણે તેઓનું સ્વાસ્થય કથળ્યું હતું અને મંગળવારે સવારે‌ તેઓએ પરલોક ગમન કર્યું હતું .

બ્રાહ્મણ પરિવારમાં મૃત દેહને અગ્નિદાહ આપીને અંતિમ વિધિ કરવામાં આવે છે. પરંતુ તેઓની ઈચ્છા અનુસાર તેમના મૃતદેહને ખારીવાવડી સનાતન આશ્રમ ખાતે સંપ્રદાયના ભક્તો ના શાસ્ત્રોક્ત,વેદોક્ત મંત્રોચ્ચાર શ્રી રામ જય રામ જય જય રામ ના નાદ સાથે સંતને સમાધિ આપવામાં આવી હતી. આ પ્રસંગે તેમના પરિવારજનો તેમજ દૂર દૂરથી તેમના ભક્તગણે મોટી સંખ્યામાં ઉપસ્થિત રહી ગુરુના અંતિમ દર્શન કરતાં ભાવ વિભોર બની શ્રધ્ધા સુમન સમપિર્ત કયૉ હતા.

અહેવાલ યશપાલ સ્વામી