ભગવાન જગન્નાથજી ની 142 મી રથયાત્રા પૂર્વે સૌ પ્રથમ વાર નીકળેલી જળયાત્રાના સાક્ષી બનતાં મેઘરાજા…

આનંદ સરોવર સામે આવેલ ગણેશ આશ્રમથી રીમઝીમ વરસાદ વચ્ચે જગન્નાથની જળયાત્રા ભક્તિ સંગીતના સૂરો સાથે પ્રસ્થાન પામી જગન્નાથ મંદિરે સંપન્ન બની.

પાટણ તા. 2
ગવાન જગન્નાથજીની પરંપરાગત 142 મી રથયાત્રા 7 જુલાઈ ના રોજ ભગવાન જગન્નાથજી ના મંદિર પરિસર ખાતેથી નિકળવાની છે ત્યારે ભગવાન ની જળયાત્રાનું અનેરુ મહત્વ હોય છે. પરંતુ પાટણની સરસ્વતી નદી સૂકી ભઠ્ઠ હોઈ છેલ્લા ઘણાં વર્ષોથી આ કાર્યક્રમ થઇ શકતો ન હતો પરંતુ ચાલુ સાલથી રથયાત્રા પૂર્વે પાટણના આનંદ સરોવર પાસે આવેલા ગણેશ આશ્રમ માંથી ભવ્ય જળયાત્રાનું આયોજન રથયાત્રા સમિતિએ કર્યું હતું .

પાટણ શહેર ના ગણેશ આશ્રમ ખાતે આજે મંગળવારે શાસ્ત્રોક્ત વિધિ વિધાન અનુસાર જળના પવિત્ર કરણ માટે વિદ્વાન બ્રાહ્મણો થકી 999 નદીઓ તેમજ 64 તિર્થ ક્ષેત્રોનું આહ્વાન કરવામાં આવ્યું હતું.જળના પવિત્રકરણની સાથે સાથે જગત જનની મા જગદંબાનું આહ્વાન કરીને માં ને નિમંત્રણ પાઠવવામાં આવ્યું હતું . તે માટે નવદુર્ગાના પ્રતિક સ્વરૂપ નવ કુંવાશી દિકરીઓનું પૂજન કરવામાં આવ્યું હતું.

જગદંબાને રિઝવવા માટે વિદ્વાન બ્રાહ્મણો દ્વારા માતાજીની સ્તુતિ કરી શાસ્ત્રોક્ત શ્લોકોના ગાન સાથે માતાજીને આ પ્રસંગે સાક્ષી બનાવવા આહ્વાન કરવામાં આવ્યું હતું તેમજ મખમલનું કાપડ તેમજ ફૂલોથી અલંકારીત પાલખીમાં ભગવાન જગન્નાથજી પરિવારને જયઘોષ સાથે બિરાજમાન કરવામાં આવ્યા હતા.

ભગવાન જગન્નાથજી, ભ્રાતા બલરામજી અને બહેન સુભદ્રાજીનું પૂજન અર્ચન કરી જય રણછોડ, માખણ ચોર ના ગગનભેદી નારા સાથે કાવડમાં જળયાત્રા પાટણના રાજમાર્ગો ઉપર ઢોલ-નગારા સાથે વરસતા વરસાદ માં પ્રસ્થાન થઈ હતી. જેમાં મોટી સંખ્યા ભવિક ભક્તો જળયાત્રા માં જોડયા હતા. જળ યાત્રા ગણેશ આશ્રમ થી નિકળીને સુભાષ ચોક, જુનાગંજ બજાર, હિંગળાચાચર ચોકથી મુખ્ય બજારમાં થઈ ઘીવટા નાકાથી નિજમંદિર પહોંચી હતી.

જયાં જળયાત્રા નું ભવ્ય સામૈયું કરી જળયાત્રા ના પવિત્ર જળથી ભગવાનનો જળાભિષેક શાસ્ત્રોક્ત મંત્રોચ્ચાર દ્વારા કરવામાં આવ્યો હતો. અભિષેક માટે અભિમંત્રિત જળમાં ઘી, દૂધ, દહીં, સાકર, ગુલાબ જળ, કેવડાજળ, યમુનાજળ, કેસર, ચંદન જેવા કુદરતી દ્રવ્યો નાંખીને ભક્તોએ ભગવાનને રીઝવવાનો પ્રયત્ન કર્યો હતો.

ભગવાન જગન્નાથજીની 142 મી રથયાત્રા ને લઈને સૌપ્રથમવાર આયોજિત કરાયેલ જળયાત્રાની શાસ્ત્રોક્ત વિધિ જગન્નાથ મંદિર ટ્રસ્ટના ટ્રસ્ટીગણ સહિત રથયાત્રા સમિતિના સેવાભાવી કાર્યકર્તાઓ જગન્નાથ ભક્તો દ્વારા કરવામાં આવી હતી આ પ્રસંગે મોટી સંખ્યામાં ભગવાન જગન્નાથજીના ભક્તોએ ઉપસ્થિત રહી જળયાત્રાની શાસ્ત્રોક વિધિ સાથે નીકળેલી જળયાત્રામાં જોડાયા હતા.

અહેવાલ યશપાલ સ્વામી