ચાણસ્મા વિધાનસભા વિસ્તારના પ્રશ્નોને જનમંચ કાર્યક્રમ થકી સાંભળતા વિધાનસભાના વિરોધ પક્ષના નેતા..

લોકોની સમસ્યાઓ જાણી વિધાનસભામાં તેની ધારદાર રજૂઆત કરવાની ખાતરી અપાઈ..

પાટણ તા. ૫
ચાણસ્માના સરદાર ચોક ખાતે કોંગ્રેસનો જનમંચ કાર્યક્રમ સોમવારે ગુજરાત પ્રદેશ કોંગ્રેસ સમિતિના પૂર્વ અધ્યક્ષ અમિતભાઈ ચાવડા ના અધ્યક્ષ પદે યોજાયો હતો. જેમાં ચાણસ્મા વિધાનસભા મતવિસ્તાર ના લોકોએ પોતપોતાના વિસ્તારના વિવિધ પ્રશ્નોની જાહેરમાં રજૂઆતો કરી હતી. જે
તમામ રજૂઆતો વિધાનસભા માં પહોંચાડી તેનું નિરાકરણ કરવાની વિપક્ષ નેતા અમિત ચાવડાએ જાહેર મંચ ઉપરથી ખાતરી આપી હતી.

પ્રદેશ કોંગ્રેસ દ્વારા સમગ્ર રાજ્યમાં વિધાનસભા વિસ્તાર દીઠ જનમંચ કાર્યક્રમનું આયોજન કરવામાં આવ્યું છે. જે અંતર્ગત વિધાન સભા નેતા અમિત ચાવડાના અધ્યક્ષ સ્થાને સોમવારે ચાણસ્મા વિધાન સભા મતવિસ્તારનો જનમંચ કાર્યક્રમ ચાણસ્માના સરદાર ચોક ખાતે યોજાયો હતો.

જેમાં ચાણસ્મા, હારીજ, સમી, વિસ્તારના લોકોએ પોતપોતાના વિસ્તારોના વિવિધ પ્રશ્નો જેવા કે રોડ, રસ્તા, શિક્ષણ, આરોગ્ય,રેલવે અંડરબ્રીજના પ્રશ્નો, રેલવે દ્વારા જમીન સંપાદનના પૂરતા પૈસા ન આપ્યા હોવાના તેમજ પાટણ જિલ્લાને અલગ ડેરી અને જિલ્લા બેંક ન મળી હોવા સહિતના અનેક પ્રશ્નો ની જાહેરમાં રજૂઆત કરી હતી.

તો નહેરોમાં સિંચાઈ ના પાણી તેમજ તળાવ ખાલી હોવા અંગેની પણ અનેક રજૂઆતો થવા પામી હતી.તો ચાણસ્મા શહેર ભાજપ પ્રમુખ દારૂ જુગારના અડ્ડા ચલાવતા હોવા અંગેની પણ એક જાગૃત નાગરિક દ્વારા લેખિત અરજી જનમંચ કાર્યક્રમમાં ઉપસ્થિત રહેલા સ્થાનિક ધારાસભ્યને આપવામાં આવતા આ મુદ્દો ચર્ચાસ્પદ બન્યો હતો.

અહેવાલ યશપાલ સ્વામી