પાટણ શ્રમજીવી વિસ્તારની આગણવાડી ખાતે જિલ્લા વિકાસ અધિકારી દ્વારા વૃક્ષારોપણ કરવામાં આવ્યું…

એક પેડ મા કે નામ અભિયાન ને સાથૅક કરવા રોપણ કરાયેલ વૃક્ષો ના જતન માટે સંકલ્પ ગ્રહણ કરાયા..

પાટણ તા. ૬
વડાપ્રધાન નરેન્દ્ર મોદી દ્વારા પયૉવરણના જતન સાથે શરૂ કરવામાં આવેલ એક પેડ મા કે નામ અભિયાન અંતર્ગત શ્રાવણ માસના પ્રારંભે સોમવારના પવિત્ર દિવસે પાટણ શહેરના શ્રમજીવી વિસ્તાર ની ચાર આંગણવાડી કેન્દ્ર પર જિલ્લા વિકાસ અધિકારી સહિત ના મહાનુભાવોની ઉપસ્થિતિમાં વિવિધ પ્રકારના દેશી કુળના 10 વૃક્ષોનું વાવેતર કરી તેના જતન માટે સંકલ્પ ગ્રહણ કરવામાં આવ્યો હતો. જિલ્લા વિકાસ અધિકારી સહિત ઉપસ્થિત મહાનુભાવો એ આંગણવાડી ના બાળકો માટે નાસ્તામાં ઉપયોગી થઈ શકે તેવા સરગવો,લીમડો,લીંબોળી જામફળ,જાંબુ,આમળા, અરડુસી, તુલસી વગેરે રોપાઓ નું રોપણ કરવામાં આવ્યું હતું.

ત્યારબાદ તેઓએ આંગણવાડીની મુલાકાત લઈ આંગણવાડી ની ભૌતિક સુવિધાઓ વિશે ચર્ચા કરી આંગણવાડી ની જરૂરિયાતો જાણી તેને ઝડપી પૂર્ણ કરાવવા તાકીદ કરેલ હતી. સાથે સાથે તેઓએ વિસ્તારની માતાઓ અને લાભાર્થીઓ સાથે સરકારના પયૉવરણ ને અનુલક્ષીને હાથ ધરવા માં આવેલ એક પેડ મા કે નામ ના અભિયાન ને સાથૅક કરવા આંગણવાડી ખાતે રોપવામાં આવેલા વૃક્ષો ના જતન માટે અપીલ કરી તેની સંપૂર્ણ જવાબદારી લાભાર્થીઓને સોપી આંગણવાડીમાં મળતા પૌષ્ટિક આહારનો તમામ લાભાર્થીઓને નિયમિત ઉપયોગ કરવા માટેનું જણાવેલ અને આંગણવાડી મા બાળકો સ્વચ્છ આવે અને આજુ બાજુમાં આપણે એક વાલી તરીકેની સ્વચ્છતા રાખીએ તેવી શીખ પણ જિલ્લા વિકાસ અધિકારી એ આપી વાલીઓને જરૂરી માર્ગદર્શન આપ્યું હતું.

આ પ્રસંગે જિલ્લા પ્રોગ્રામ ઓફિસર ગૌરીબેન સોલંકી, કચેરી અધિક્ષક હિસાબનીશ તાલુકાના સી ડી પી ઓ, મુખ્ય સેવિકા બહેનો,આગણવાડી કાર્યકરો અને વિસ્તારના લાભાર્થીઓએ મોટી સંખ્યામાં ઉપસ્થિત રહી એક પેડ મા કે નામ કાર્યક્રમમાં ઉત્સાહપૂર્વક ભાગ લીધેલ હતો.

અહેવાલ યશપાલ સ્વામી