પાટણ શહેરમાં કુલ 16 ડેન્ગ્યુ ના કેસો પૈકી 3 કેસો પોઝિટિવ : સારવાર અર્થે પાટણ સિવિલ હોસ્પિટલ દાખલ કરાયા..

પોલીસ અને પાલિકાને સાથે રાખી આરોગ્ય વિભાગ દ્વારા સૂર્યાનગર વિસ્તારમાં પોરા નાશક કામગીરી સાથે ફોગિંગ કરાશે..

પાટણ તા. 22
પાટણ શહેરના વિવિધ વિસ્તારો માં ડેન્ગ્યુના પોઝિટીવ કેસ પ્રકાશમાં આવતા આવા ડેન્ગ્યુ પોઝિટીવ વિસ્તાર માં અર્બન હેલ્થ સેન્ટર પાટણ ના આરોગ્ય કર્મચારીઓ, આશા બહેનો,વેકટર કન્ટ્રોલ ટીમના સભ્યો દ્વારા ડોર ટુ ડોર તપાસ હાથ ધરી પોરાનાશક કામગીરી સઘન બનાવવામાં આવી હોવાનું જાણવા મળ્યું છે.

પાટણ શહેરના વિવિધ વિસ્તારોમાં પ્રકાશમાં આવેલા ડેન્ગ્યુ કેસો બાબતે માહિતી આપતા આરોગ્ય વિભાગ ના સુત્રોએ જણાવ્યું હતું આ હાલમાં શહેરના વિવિધ વિસ્તારો પૈકી સૌથી વધુ શહેરના સુયૉનગર વિસ્તારમાં ડેન્ગ્યુ ના મચ્છરો ના પોરા મોટી માત્રામાં જોવા મળ્યા છે.હાલ શહેર મા કુલ 16 કેસ ડેન્ગ્યુ ના હોવાનું જાણવા મળ્યું છે જેમાથી 3 કેસ પોઝિટિવ જણાતાં પાટણ સિવિલ હોસ્પિટલ માં સારવાર અર્થે દાખલ હોવાનું જણાવ્યું હતું.

તો બાકીના 13 દર્દીઓના ડેન્ગ્યુ રિપોર્ટ પ્રોસેસરમાં હોવાનું સુત્રોએ જણાવી આવતીકાલ શુક્રવારના રોજ પાટણ શહેરના સૂર્યાનગર વિસ્તારમાં પોલીસ અને પાલિકાને સાથે રાખી પોરા નાશકની કામગીરી સાથે ફોગીગ ની પ્રક્રિયા આરોગ્યની ટીમ દ્વારા કરવામાં આવનાર હોવાનું જાણવા મળ્યું છે. આરોગ્ય વિભાગ દ્વારા ડેન્ગ્યુ થી સુરક્ષિત રહેવા ઘરની આજુબાજુમાં સ્વચ્છતા રાખવા તેમજ મચ્છરોની ઉત્પત્તિ ન થાય

તે માટે પાણી ભરેલા પાત્રને નિયમિત પણે સાફકરવા, ડેન્ગ્યુ ના મચ્છરો ચોખા બંધીયાળ પાણીમાં ઉત્પન્ન થાય છે જેથી સાત દિવસથી વધુ પાણી નો સંગ્રહ કરવો નહીં, અઠવાડિયામાં એક દિવસ પાણીના પાત્રો સાફ કરવા તેમજ તે પાણીના પાત્રોને હવા ચુસ્ત રીતે ઢાંકીને રાખવા અને મચ્છરોથી બચવા મચ્છર દાની નો ઉપયોગ કરવો અથવા ગુડનાઈટ, ઓલ આઉટ, અગરબત્તી, ગૂગળનો ધૂપ જેવા ઉપકરણો નો ઉપયોગ કરવો તેમજ મચ્છર ઉત્પન્ન થાય તેવા પાત્રોને નાશ કરવા અપીલ કરી છે.

અહેવાલ યશપાલ સ્વામી