ક્રેટા કાર માંથી પોલીસ લખેલી પ્લેટ સાથે એક વિદેશી દારૂની બોટલ મળી આવી..
પાટણ તા. 14 પાટણ શિહોરી રોડ પર આવેલ મેલુસણ ગામ નજીક પોલીસ પ્લેટ વાળી ક્રેટા કાર અને પિકઅપ ડાલા વચ્ચે અકસ્માત સર્જાયો હતો જેમાં બંને ગાડીઓ ધડાકાભેર ટકરતા બંને પલટી મારી ગઈ હતી અને કાર નું આગળ નું ટાયર પણ તૂટી જવાની સાથે બન્ને ગાડી નો ભુક્કો બોલી ગયો હતો. તો પોલીસ પ્લેટ વાળી કાર માંથી એક બોટલ વિદેશી દારૂ પણ મળી આવતા અને બનાવની જાણ પોલીસને કરતા પોલીસે કાયદેસર ની કાર્યવાહી હાથ ધરી હોવાનું જાણવા મળ્યું છે.
આ અકસ્માત ની મળતી માહિતી મુજબ પાટણ શિહોરી રોડ પર આવેલ મેલુંસણ ગામ નજીક ક્રેટા ગાડી નંબર GJ 18BH 7715 ના ચાલકે ગફલત ભરી રીતે અને પુરપાટ ઝડપે માનવ જિંદગી જોખમાય તે રીતે પોતાની ગાડી હંકારી સામેથી આવતા પિક અપ ડાલા ને ધડાકાભેર ટક્કર મારતા બન્ને ગાડી રોડ પર પલટી મારી જતાં બંને ગાડી નો ભુક્કો બોલી ગયો હતો.
તો પોલીસ પ્લેટ વાળી ક્રેટા ગાડી નું ટાયર પણ ચેચીસ માંથી નીકળી ગયું હતું. બનાવની જાણ પોલીસ ને થતાં ઘટના સ્થળે પહોંચી હતી અને ગાડી ની તાપસ કરતા ગાડી માંથી એક બોટલ વિદેશી દારૂ ની મળી આવી હતી તો ગાડી ચાલક ગાડી મૂકી ફરાર થઇ ગયો હતો .
આ બનાવની પોલીસે ગાડી ચાલક સામે ફરિયાદ નોંધી કાયદેસરની કાર્યવાહી હાથ ધરી હોવાનું જાણવા મળ્યું છે. જોકે અકસ્માત ગ્રસ્ત ક્રેટા કાર માંથી પોલીસ લખેલી પ્લેટ અને વિદેશી દારૂની બોટલ મળી આવતાં લોકોમાં અનેક તકૅ વિતૅકો ઉઠવા પામ્યા છે.
અહેવાલ યશપાલ સ્વામી
