પાટણ જિલ્લાનાં 40 આરોગ્ય કેન્દ્રો ખાતે વિવિધ આરોગ્યલક્ષી સેવાઓ પૂરી પાડવા આયોજન ઘડાયું..

વિભાગીય નાયબ નિયામક,ગાંધીનગરના ડૉ. એસ.કે.મકવાણા એ તાલુકાના સેન્ટરોની મુલાકાત લીધી..

પાટણ તા. 3 ભારત સરકારના નીતિ આયોગ દ્વારા જાન્યુઆરી 2018 માં એસ્પીરેશનલ ડિસ્ટ્રીક્ટ પ્રોગ્રામ શરૂ કરવામાં આવેલ હતો જેની સફળતાના ભાગરૂપે પ્રધાનમંત્રી દ્રારા તા.7મી જાન્યુઆરી 2023 ના રોજ એસ્પીરેશનલ બ્લોક પ્રોગ્રામ શરૂ કરવા સુચવવામાં આવેલ જે અંતર્ગત દેશના 500 તાલુકા પસંદ કરવામાં આવેલ છે. જે પૈકી ગુજરાતના 13 તાલુકાઓમાં પાટણ જિલ્લાના સાંતલપુર તાલુકાનો સમાવેશ કરવામાં આવેલ છે. આ એસ્પીરેશનલ તાલુકાઓમાં વિવિધ વિભાગો સાથે સંકલન અને જીવનલક્ષી અભિગમને આવરી લઇ અને સમતોલ વિકાસ થાય તે હેતુસર પ્રધાનમંત્રી દ્વારા તા.30 મી સપ્ટેમ્બર 2923 ના રોજ જાહેર કર્યા મુજબ “સંકલ્પ સપ્તાહ”  સબકી આકાંક્ષાએ સબકા વિકાસ ની ઉજવણી તા. 1/10 થી તા. 9/10/23 સુધી કરવામાં આવશે. જેમાં આરોગ્યને લગતી થીમ “સંપૂર્ણ સ્વાસ્થ્ય – એક સંકલ્પ” અન્વયે તા. 3/10 ના રોજ પાટણ જિલ્લાના સાંતલપુર તાલુકાના તમામ 32 હેલ્થ એન્ડ વેલનેસ સેન્ટર, 6 પ્રા.આ.કેન્દ્ર (અબિયાણા, બોરુડા, ધોકાવાડા, કોલીવાડા, મઢુત્રા, ઝઝામ)  ૨ સા.આ.કેન્દ્ર ( વારાહી અને સાંતલપુર) મળી કુલ 40 આરોગ્ય કેન્દ્રો ખાતે નીચે જણાવેલ અલગ અલગ આરોગ્યલક્ષી સેવાઓ પૂરી પાડવા માટે આયોજન કરવામાં આવેલ છે.

જેમાં સગર્ભા બહેનોની તપાસ,માતા અને બાળકોને રસીકરણ,બિનચેપી રોગો જેવા કે બી.પી., ડાયબીટીસ, કેન્સરનું સ્ક્રીનીંગ, કિશોરીઓમાં એનેમીયાનું ટેસ્ટીંગ અને સારવાર, ટી.બી. રોગોનું નિદાન તથા સારવાર અને ટી.બી. હારેગા દેશ જીતેગા અંતર્ગત નિક્ષય (ટીબી) મિત્રની નિયુક્તિ તથા ટીબી ચેમ્પીયન રેલી, આયુષ્માન ભારત હેલ્થ એકાઉન્ટ (ABHA) નું રજીસ્ટ્રેશન, આયુષ્માન કાર્ડ બનાવવા,વિવિધ આરોગ્યલક્ષી યોજનાઓ અને કાર્યક્રમની પ્રચાર-પ્રસાર કામગીરી વગેરે આ તબક્કે મંગળવારે વિભાગીય નાયબ નિયામક ગાંધીનગરના ડૉ. એસ. કે. મકવાણા દ્વારા તાલુકાના સેન્ટરોની મુલાકાત લેવામાં આવી હતી.

આ સેવાઓ લોકોને વધુને વધુ અને ગુણવત્તાયુક્ત તેમજ સત્વરે મળી રહે તે માટે મેડીકલ / પેરામેડીકલ સ્ટાફને જરૂરી માર્ગદર્શન આપવામા આવ્યું છે. તેમજ ડૉ. એસ.કે. મકવાણા દ્વારા આભા રજીસ્ટ્રેશન તથા કિશોરીઓમાં એનેમીયા ટેસ્ટીંગ બાબતે ઉંડાણપૂર્વક રસ લઇને કામગીરીમાં સુધારાત્મક પગલાં લેવા સંબંધિત સ્ટાફને સુચના આપવામા આવી હતી. વધુમાં જિલ્લા તથા તાલુકાના અધિકારીઓ સાથે સા.આ.કેન્દ્ર વારાહી ખાતે મીટીંગ રાખી એસ્પીરેશનલ તાલુકા પ્રોગ્રામ હેઠળના સૂચકાંકો સુધારવા માટે રોડમેપ બનાવવા જરૂરી માર્ગદર્શન તથા સુચના આપવામા આવી હતી. ટી.બી. મુક્ત પંચાયત અંતર્ગત ડૉ. એસ.કે. મકવાણાનાં હસ્તે ટીબીના લાભાર્થી ઓને પોષણયુક્ત કીટનું વિતરણ પણ કરવામાં આવેલ છે. એકંદરે આજના સંકલ્પ સપ્તાહ કાર્યક્રમના આયોજન અને જિલ્લા તથા તાલુકાના અધિકારી તથા કર્મચારીઓને સારી કામગીરી બદલ સંતોષ વ્યક્ત કરી ડૉ. એસ.કે. મકવાણા દ્વારા તમામને અભિનંદન પાઠવવામાં આવ્યાં હતા.

અહેવાલ યશપાલ સ્વામી