બ્યુટી એન્ડ વેલનેસ લેબનું ઉપસ્થિત મહાનુભાવોના વરદ હસ્તે ઉદ્ઘાટન કરાયું…
પાટણ તા. ૨૦
પાટણની નૂતન વિનય મંદિર ટ્રસ્ટ સંચાલિત નૂતન વિનય મંદિર ઉચ્ચતર માધ્યમિક શાળા ખાતે મંગળ વારે સામાજિક ન્યાય દિવસની ઉજવણી કરવામાં આવી હતી.ઉપરોક્ત ઉજવણી અંતગૅત જિલ્લા કાનૂની સેવા સત્તા મંડળ પાટણના સેક્રેટરી જજ શ્રીમતી આર. એ. નાગોરીએ ઉપસ્થિત રહી બાળકો અને ખાસ કરીને દીકરીઓને થતાં અન્યાય સાથે કેવી રીતે કાનૂની પગલાં ભરવા તેની સુંદર સમજ આપી હતી.તેમની સાથે પધારેલ પેનલ એડવોકેટ શ્રીમતી એલ.એ.પંચાલે પણ શાળાના બાળકોને જુદા જુદા હેલ્પ નંબર દ્વારા કેવી રીતે ન્યાય મેળવવો તેની સંપૂર્ણ સમજ આપી હતી.
આ ઉપરાંત તાજેતરમાં જ સ્માર્ટ બોર્ડ ના ઉદઘાટન દ્વારા નૂતન વિનય મંદિર ઉ.મા. શાળા, પાટણ ડિજિટી લાઇઝેસન તરફ આગળ વધી છે ત્યારે શાળામાં બાળકોના વ્યવસાયિક શિક્ષણમાં જુદી જુદી સ્કિલ પ્રાપ્ત કરી શકે અને પોતાનું આર્થિક ઉપાર્જન જાતે મેળવી શકે તે માટે બ્યુટી એન્ડ વેલનેસમાં નવી લેબનું ઉદઘાટન પણ ઉપસ્થિત આર.એ. નાગોરીના હસ્તે કરવામાં આવ્યું હતું.આ પ્રસંગે આસિસ્ટન્ટ જજ મુકેશ ભાઈ આર. માળી પણ ઉપસ્થિત રહ્યા હતા.શાળાના આચાર્યએ સામાજિક ન્યાય દિવસનો સાર જણાવી સૌનો આભાર વ્યક્ત કરી શાળાના બાળકો ઉત્તરોત્તર જ્ઞાન મેળવે તથા જુદી જુદી સ્કીલ પ્રાપ્ત કરે તેવી શુભેચ્છા પાઠવી હતી. શાળાના સિનિયર શિક્ષક હરગોવનભાઈ રબારી એ કાર્યક્રમનુ સંચાલન કર્યું હતું. કાર્યક્રમને સફળ બનાવવા શાળાના તમામ કર્મચારીઓએ સહયોગ આપી જહેમત ઉઠાવી હતી.
અહેવાલ યશપાલ સ્વામી
