ગામના શ્રી જોગણી માતાજીના મંદિર પરિસર ખાતેથી માતાજીના નીકળેલા રથમાં સમસ્ત ગ્રામજનો જોડાયા..
પાટણ તા. 23
ભારતીય સંસ્કૃતિની પરંપરાઓ પણ અનેરી છે વર્ષો પૂર્વે ગ્રામ્ય વિસ્તારો માં ગામની રચના થઈ હોય ત્યારે વડીલો દ્વારા ગામની તેમજ ગ્રામ લોકોની રક્ષા માટે ગામ તોરણ ગામના ગોંદરે બાંધવામાં આવતું હતું. જે ગામ તોરણને વર્ષોની પરંપરા અનુસાર ગામની રચનાના દિવસે ધાર્મિક વિધિ વિધાન સાથે સમસ્ત ગ્રામજનો એકત્રિત થઈ નવુ તોરણ બાંધી સમગ્ર ગામ જનોની સુખ,સમૃદ્ધિ અને શાંતિ બની રહે તેવી પ્રાર્થના વ્યક્ત કરાતી હોય છે.
ત્યારે આવી જ પરંપરા ગતરોજ પાટણની સમીપ આવેલા અનાવાડા ગામના ગ્રામજનો દ્વારા ગામ મુકામે શ્રી જોગણી માતાના મંદિર ખાતે થી પરંપરાગત મુજબ માતાજી નો રથ કાઢવામાં આવ્યો. અને ગામ તોરણીયે ભક્તિ સભર માહોલમાં વિધિ વિધાન મુજબ નવીન તોરણ બાંધવામાં આવ્યું હતું.
આ પ્રસંગે ગામના સૌ લોકોએ ભેગા મળી આ વર્ષોની પરંપરા મુજબ ઉજવાતા પ્રસંગ નો લાભ લઈ સમસ્ત ગ્રામજનોમાં સુખ,સમૃદ્ધિ અને શાંતિ બની રહે તેવી પ્રાર્થના કરી પ્રસંગને દીપાવ્યો હતો.
