પાટણ શહેરમાં વરસાદમા ધોવાણ થયેલા માર્ગોનું પાલિકા તંત્ર દ્વારા યુદ્ધના ધોરણે સમારકામ હાથ ધરાયું..

રેલ્વે ગરનાળા પાસેના સમારકામની કામગીરીનું શહેર ભાજપ પ્રમુખ, પાલિકા પ્રમુખ, કારોબારી ચેરમેન સહિતની ટીમે નિરીક્ષણ કર્યું..

પાટણ તા. 6
પાટણ શહેરમાં છેલ્લા એક સપ્તાહથી પડી રહેલા વરસાદના કારણે શહેરના વિવિધ વિસ્તારના માર્ગો નું ધોવાણ થતાં અને માર્ગો પર મસ મોટા ખાડા પડી જતા માર્ગ પરથી પસાર થતા વાહન ચાલકો અને રાહદારીઓમાં અકસ્માતની સંભાવનાઓ સેવાઈ રહી હતી. ત્યારે શુક્રવારે બંધ રહેલા વરસાદને ધ્યાનમાં રાખીને પાટણ નગરપાલિકા તંત્ર દ્વારા શહેરના વિવિધ વિસ્તારોમાં માર્ગો પર પડેલા ખાડાઓનું પુરાણ કરવાની કામગીરી યુદ્ધના ધોરણે હાથ ધરવામાં આવી હતી. પાટણ નગરપાલિકા તંત્ર દ્વારા શહેરના પ્રથમ રેલવે ગરનાળા પાસે પડેલા માર્ગ પરના ખાડાઓનું રોડા કોંકરેટ અને બ્લોક દ્વારા પુરાણ કરી માર્ગને સમતળ બનાવવામાં આવ્યો હતો.

પાલિકા તંત્રના કર્મચારીઓ દ્વારા હાથ ધરાયેલી ખાડા પુરાણની રેલવેના પ્રથમ ગરનાળા પાસે ચાલતી કામગીરીનું પાટણ શહેર ભાજપ પ્રમુખ કિશોરભાઈ મહેશ્વરી, પાલિકા પ્રમુખ હિરલબેન પરમાર, કારોબારી ચેરમેન મુકેશભાઈ પટેલ, ઉપપ્રમુખ હિનાબેન શાહ, બાંધ કામ કમિટીના ચેરમેન મહેશભાઈ પટેલ, ભૂગર્ભ શાખાના ચેરમેન પ્રવિણા બેન પ્રજાપતિ સહિતના ઓએ ઉપસ્થિત રહી કામગીરી નું નિરીક્ષણ કરી કર્મચારીઓને ખાડાઓનું સુવ્યવસ્થિત રીતે પુરાણ થાય તે માટે જરૂરી સૂચનો કર્યા હતા.

પાલિકા પ્રમુખે વરસાદના કારણે પડેલા ખાડાઓની હાથ ધરાયેલી પુરાણ કામગીરીને લઈને જણાવ્યું હતું કે ટૂંક સમયમાં પાલિકા તંત્ર દ્વારા શહેરના તમામ વિસ્તારોમાં પડેલા ખાડાઓનું પુરાણ કરી વરસાદ સંપૂર્ણપણે બંધ રહેતા જે જે વિસ્તારમાં જરૂરિયાત જણાય તે વિસ્તારમાં ડામર રોડ ની કામગીરી પણ હાથ ધરવામાં આવનાર હોવાનું  જણાવ્યું હતું.

અહેવાલ યશપાલ સ્વામી