પાટણ શ્રી જગન્નાથ મંદિર પરિસર ખાતે એકાદશીના પવિત્ર દિવસે ભગવાન સન્મુખ 125 કિલો કેરીનો મનોરથ યોજાયો..

કેરી મનોરથના દર્શનાર્થે વહેલી સવારથી જ જગન્નાથ ભક્તો મંદિર પરિસર ખાતે ઉમટયા..

પાટણ તા. ૧૮
પાટણ શહેરના રોકડિયા ગેટ વિસ્તારમાં આવેલા પ્રસિદ્ધ શ્રી જગન્નાથ મંદિર પરિસર ખાતેથી આગામી તારીખ 7 જુલાઈના રોજ અષાઢી બીજ ના પવિત્ર દિવસે નીકળનારી ભગવાન જગન્નાથજીની 142 મી રથયાત્રાને લઈને શ્રી જગન્નાથ મંદિર ટ્રસ્ટ તેમજ શ્રી જગન્નાથ ભક્તો દ્વારા તૈયારીઓ હાથ ધરવામાં આવી છે

ત્યારે મંગળવાર ને એકાદશી ( ભીમ અગિયારસ) ના પવિત્ર દિવસે યજમાન પરિવાર દ્વારા ભગવાન શ્રી જગન્નાથજી, ભાઈ બલભદ્રજી અને બહેન સુભદ્રાજી સન્મુખ 125 કિલો કેરીના સુંદર મનોરથ નું ભક્તિ સભર માહોલમાં આયોજન કરવામાં આવ્યું હતું.

મંદિર પરિસર ખાતે મંદિરના પૂજારી તેમજ જગન્નાથ મંદિર ટ્રસ્ટના ટ્રસ્ટીગણ અને જગન્નાથ ભગવાનના સેવકો દ્વારા કેરીના મનોરથને સુંદર રીતે સજાવવામાં આવ્યો હતો જે મનોરથના દર્શન માટે વહેલી સવાર થી જ મોટી સંખ્યામાં ભાવિક ભક્તોમંદિર પરિસર ખાતે ઉમટ્યા હતાં.

ભગવાન જગન્નાથજીના મંદિર પરિસર ખાતે એકાદશીના પવિત્ર દિવસે આયોજિત કરાયેલા કેરીના મનોરથ સહિત ના ધાર્મિક ઉત્સવોને સફળ બનાવવા જગન્નાથ મંદિર ટ્રસ્ટના ટ્રસ્ટીગણ મંદિરના પૂજારી તેમજ જગન્નાથ ભક્તો દ્વારા જહેમત ઉઠાવવામાં આવી હતી.

ચાલુ સાલે ભારતના ત્રીજા નંબરની અને ગુજરાતમાં બીજા નંબરની ગણાતી પાટણની ભગવાન જગન્નાથ જીની 142 મી રથયાત્રા પણ ભવ્યાતિ ભવ્ય બની રહે તે માટે મંદિર પરિસર ખાતે તડામાર તૈયારીઓ ચાલી રહી હોવાનું જગન્નાથ મંદિર ટ્રસ્ટના મેનેજિંગ ટ્રસ્ટી પિયુષભાઈ આચાર્યએ જણાવ્યું હતું.

અહેવાલ યશપાલ સ્વામી